ޖެނުއަރީމަހު ބޭރަށްހިންގާތީ ރިޕޯޓުކުރެވުނު އަދަދު އިތުރުވެއްޖެ

މިދިޔަ އަހަރުގެ ޑިސެމްބަރު މަހާ އަޅާބަލާއިރު މިއަހަރުގެ ޖެނުއަރީ މަހު ބޭރަށް ހިންގުން ޖެހިގެން ރިޕޯޓް ކުރެވުނު އަދަދު އިތުރުވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިއަދު ބުނެފިއެވެ.

އެޗްޕީއޭއިން އާންމުކުރި ތަފާސް ހިސާބުތަކުން ދައްކާ ގޮތުން ޑިސެމްބަރު މަހު ބޭރަށް ހިންގުން ޖެހިގެން 3,486 ކޭސް ރިޕޯޓު ކުރެވުނުއިރު ޖެނުއަރީ މަހު އެ އަދަދު ވަނީ 5,386 އަށް އިތުރުވެފައެވެ.

އެހެންކަމުން ބޭރަށް ހިންގުން ފަދަ ބަލިތަކުން ރައްކާތެރިވުމުގެ ފިޔަވަޅުތައް އެޅުމަކީ މުހިއްމުކަމެއްކަން އެޗްޕީއޭއިން ވަނީ ފާހަގަކޮށްފައެވެ.

އެޗްޕީއޭއިން ހާމަކުރި ގޮތުގައި ޑިސެމްބަރު މަހާ އަޅާބަލާއިރު މި އަހަރު ޖަނަވަރީ މަހު އަރިދަފުސް ރޯގާއާއި ޑެންގޫ ހުން ޖެހިގެން ރިޕޯޓް ކުރެވުނު އަދަދު ވަނީ މަދުވެފައެވެ.

ނަމަވެސް އިންފުލުއެންޒާގެ އަލާމާތްތައް ހުރެގެން ޓެސްޓް ކުރެވުނު އަދަދު ވަނީ އިތުރުވެފައެވެ. އެގޮތުން މިއަހަރުގެ މިހާތަނަށް ޓެސްޓް ކުރެވުނު 352 ސާމްޕަލްގެ ތެރެއިން 12 ސާމްޕަލް ވަނީ ޕޮޒިޓިވް ވެފައެވެ.