ވިއްސާރައިގެ ސަބަބުން 81 މީހަކަށް ވަގުތީ ބޯހިޔާވަހިކަން ފޯރުކޮށްދީފި

ވިއްސާރައިގެ ސަބަބުން 81 މީހަކަށް ވަގުތީ ބޯހިޔާވަހިކަން ފޯރުކޮށްދީފައިވާކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭއިން) މައުލޫމާތުދީފިއެވެ.

އިއްޔެ ކުރި ވިއްސާރައިގެ ސަބަބުން ރާއްޖޭގެ އެކި ސަރަހައްދުތަކަށް ބޯކޮށް ވާރޭވެހުމާއި އެކު ގުގުރާފައިވެއެވެ. އެގޮތުން، މެދުކެނޑުމެއްނެތި އެތައް ގަޑީރެއް ވަންދެން ވާރޭ ވެހުމުގެ ސަބަބުން ބައެއް ގެތަކަށް ފެންވަދެ ގޭގައި ހުރި ސާމާނުތަކަށް ގެއްލުންވެފައިވެއެވެ. އަދި މީގެ އިތުރުން މަގުމަތީގައި ދުއްވާ އެތައް އުނޅަންދުފަހަރަކަށްވެސް ގއްލުންވެފައިވާކަމަށް މައުލޫމާތު ލިބެއެވެ.

އެންޑީއެމްއޭއިން މައުލޫމާތު ދީފައިވާ ގޮތުން އިއްޔެ ރާއްޖެއަށް ކުރި ވިއްސާރައިގެ ސަބަބުން، 14 ގެއެއް ފެންބޮޑުވެ 81 މީހަކަށް އެންޑީއެމްއޭގެ ފަރާތުން ވަގުތީ ބޯދިޔާވަހިކަން ފޯރުކޮށްދީފައިވެއެވެ.

މީޓިއޮރޮލޮޖިކަލް ސެންޓަރުން މައުލޫމާތު ދިން ގޮތުންނަމަ އެންމެ ބޯކޮށް ވާރޭ ވެހުނީ މާލެއަށެވެ. އަދި މީގެ އިތުރުން އެކި ވަރުގެ ގެއްލުންވެގެން 5 ރަށަކުން ރިޕޯޓުކޮށްފައިވެއެވެ.

އެގޮތުން، އެންޑީއެމްއޭއިން ބުނެފައިވަނީ، 81 މީހުނަށް ވަގުތީ ބޯހިޔާވަހިކަން ފޯރުކޮށްދެވުނު ކަމުގައި ވީނަމަވެސް، މާލެއަށް ލިބިފައިވަނީ ކިހާ ވަރެއްގެ ގެއްލުމެއްކަން އިންގޭނީ އެސެސްމެންޓްތަކެއް ހަދައިގެންކަމަށެވެ. އެގޮތުން އެސެސްމަންޓް ހެދުމުގެ މަސައްކަތް މިއަދު ކުރިއަށްދާނެކަމަށް އެންޑީއެމްއޭއިން ބުނެފައިވެއެވެ.