ބާސެލޯނާ ސްޕެނިޝް ސުޕަ ކަޕް ފައިނަލަށް

ސްޕެނިޝް ސުޕަ ކަޕްގެ ފައިނަލުގެ ފަހު ޖާގަ ބާސެލޯނާ ހޯދައިފި އެވެ.

ބާސެލޯނާ ފައިނަލަށް ދަތުރުކުރީ ރޭ ކުޅުނު ސެމީ ފައިނަލުގައި އޮސަސޫނާ 0-2 އިން ބަލިކޮށްގެންނެވެ.

މިއަހަރުގެ ސުޕަ ކަޕް ވެސް ކުޅެނީ ސައުދީ އަރަބިއާގަ އެވެ. ސްޕެއިންގެ ހަތަރު ޓީމު ވާދަކުރާ މުބާރާތުގެ ފައިނަލުގައި ބާސެލޯނާ ނުކުންނާނީ ރެއާލް މެޑްރިޑާ ދެކޮޅަށެވެ. ރެއާލް ފައިނަލަށް ދަތުރުކުރީ އެތުލެޓިކޯ މެޑްރިޑް 3-5 އިން ބަލިކޮށްގެންނެވެ.

ރޭގެ މެޗުގައި ބާސެލޯނާގެ ގޯލުތައް ކާމިޔާބުކޮށްދިނީ ރޮބާޓް ލެވަންޑޯސްކީ އާއި ލެމީން ޔަމާލް އެވެ. ލެވަންޑޯސްކީ ފުރަތަމަ ގޯލު ޖެހީ 59 ވަނަ މިނެޓުގަ އެވެ. ޔަމާލް އެޓީމަށް ލީޑު ފުޅާކޮށްދިނީ މެޗުގެ އިތުރު ވަގުތުގަ އެވެ.

ސްޕެނިޝް ސުޕަ ކަޕްގައި ވާދަކުރާ ލީގުގެ ގަދަ ތިން ޓީމާއި ސްޕެނިޝް ކޮޕަ ޑެލްރޭގެ ޗެމްޕިއަން ޓީމެވެ. މިފަހަރު އޮސަސޫނާ މުބާރާތުގައި ބާދަކުރީ މިދިޔަ ސީޒަނުގެ ކޮޕަޑެލްރޭގެ ފައިނަލުގައި ކުޅުނު ޓީމުގެ ހައިސިއްޔަތުންނެވެ.

ބާސެލޯނާ އާއި ރެއާލް މެޑްރިޑް ވާދަކުރާ ފައިނަލް ސައުދީގައި ކުޅޭނީ އާދީއްތަ ދުވަހުގެ ރޭ މެންދަމު 12 ޖަހާއިރު އެވެ.