ސަފީރުގެ ބައްދަލުވުމަކީ ކުރިން ރޭވިފައި އޮތް ބައްދަލުވުމެއް: ހައި ކޮމިޝަން

އިންޑިއާގެ ސަފީރު މުނޫ މަހާވަރު ރާއްޖޭގެ ފޮރިން މިނިސްޓްރީއަށް މިއަދު ހާޒިރުވެވަޑައިގެންނެވި ކުރިން ތާވަލުކޮށްފައިވާ ބައްދަލުވުމަކަށް ކަމަށް ރާއްޖޭގައި ހުންނަ އިންޑިއާ ހައިކޮމިޝަނުން ބުނެފިއެވެ.

ސަރުކާރުގެ ތިން ޑެޕިއުޓީ މިނިސްޓަރަކު އިންޑިއާގެ ބޮޑުވަޒީރު ނަރެންދްރަ މޯދީއަށް ކުޑައިމީސްކޮށް މަލާމާތްކުރި މައްސަލައިގައި, އިންޑިއާގެ ވެރިރަށް ދިއްލީގައި ހުންނަވާ ދިވެހި ސަފީރު އިބްރާހިމް ޝަހީބު އެ ގައުމުގެ އެކްސްޓާނަލް މިނިސްޓްރީއަށް މިއަދު ހާޒިރުކުރިއެވެ.

ގާތްގަނޑަކަށް އޭގެ ތިންގަޑިއިރު ފަހުން ރާއްޖޭގައި ހުންނަވާ އިންޑިއާ ސަފީރު ފޮރިން މިނިސްޓްރީއަށް ވަޑައިގެންނެވިއެވެ. ކުރިން މައުލޫމާތު ލިބިފައިވާ ގޮތުން މަހާވަރު ފޮރިން މިނިސްޓްރީއަށް ހާޒިރުކުރީއެވެ.

ނަމަވެސް ރާއްޖޭގައި ހުންނަ އިންޑިއާ ހައިކޮމިޝަނުން އެކްސްގައި ކުރި ޕޯސްޓެއްގައި ބުނީ، ސަފީރު މުނޫ މަހާވަރު، އެމްބެސެޑާ އެޓް ލާޖް ޑރ އަލީ ނަސީރު މުހައްމަދާ އެކު މިއަދު ބޭއްވެވި ބައްދަލުކުރެއްވުމަކީ ''ޕްރީ އެރޭންޖްޑް'' ބައްދަލުވުމެއް ކަމަށެވެ.

އެ ބައްދަލުވުމުގައި ގުޅުން އިތުރަށް ބަދަހިކުރެއްވުމާ ބެހޭގޮތުން މަޝްވަރާކުރި ކަމަށް އިންޑިއާ ހައިކޮމިޝަނުން ބުންޏެވެ.

އިންޑިއާގެ ލަކްޝަދީޕް ޕްރޮމޯޓުކޮށް، މޯދީ ކުރެއްވި ޕޯސްޓަކާ އެކު ތިން ޑެޕިއުޓީ މިނިސްޓަރު ވަނީ އެމަނިކުފާނަށް ކުޑައިމީސްވާ ގޮތަށް ވާހަކަދައްކައިފައެވެ. އެ ތިން ޑެޕިއުޓީން ވަނީ މިހާރު ސަސްޕެންޑްކޮށްފައެވެ. އެ މައްސަލަ ވަނީ ވަރަށް ބޮޑަށް ގޯސްވެފައެވެ.

އެ މައްސަލާގައި ރާއްޖެއަށް ބޮއިކުޓް ކުރުމަށް ގޮވާލާއި ޝޯޝަލް މިޑީއާގައި ކެމްޕޭނެއް ވަނީ ފަށާފައެވެ.