އެތައް މަހުޖަނުންނެއް އައު އަހަރު ފާހަގަކުރަން ޕްރައިވެޓް ޖެޓުތަކުގައި ރާއްޖެ އަތުވެއްޖެ

އައު އަހަރުގެ ފެށުމާ ދިމާކޮށް ރާއްޖެއަށް ގިނަ އަދަދެއްގެ މަހުޖަނުން ޗުއްޓީ ހޭދަކުރަން ޕްރައިވެޓު ޖެޓުތަކުގައި އަންނަމުންދާކަމަށް މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް)އިން ބުނެފިއެވެ.

ކުރިސްމަސް ދުވަސްވަރާއި އައު އަހަރަކީ ހުޅަނގުގެ ޤައުމުތަކުގައި ބަންދު ދުވަސްތަކަށްވެފައި އެ ދުވަސްވަރު ދުނިޔޭގެ އެކި ކަންކޮޅުތަކުން މުއްސަނދިން ރާއްޖެއަށް ޒިޔާރަތްކުރެއެވެ.

މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން މައުލޫމާތު ހިއްސާކޮށްފައިވާގޮތުން މިއަހަރުގެ އައު އަހަރާ ދިމާކޮށް 30 އަށްވުރެ ގިނަ ޕްރައިވެޓް ޖެޓު ވެލާނާ އިންޓަނޭޝަނލް އެއާޕޯޓަށް އައިސްފައިވެއެވެ.

މީގެ އިތުރުން، އައު އަހަރާ ދިމާކޮށް ދުނިޔޭގެ މަޝްހޫރު އެކި މަހުޖަނުން އެމީހުންގެ އާއިލާއާއިއެކު އަމިއްލަ ޖެޓުތަކުގައި ރާއްޖެއަށް ދަތުރުކުރާއިރު އެ ޖެޓުތަކަށް އިތުރު ޖާގަ ހެދުމަށްޓަކައި ވީއައިއޭގައި ޖެޓު ޕާކުކުރުމަށް އިތުރު ޕާކިންގް ސްލޮޓުތަކެއް ހަދާފައިވެއެވެ. އެގޮތުން، ކުރިން 38 ޕްރައިވެޓް ޖެޓު ޕާކުކުރެވޭ ވީއައިއޭގައި މިހާރު އެއްފަހަރާ 68 ޖެޓު ޕާކު ކުރެވޭނެކަމަށް އެމްއޭސީއެލް އިން މައުލޫމާތު ދީފައިވެއެވެ.

އެގޮތުން، އެމްއޭސީއެލް ގެ ކޯޕަރޭޓް ކޮމިޔުނިކޭޝަންސް ޑިރެކްޓަރު ޝަމްއާން ޝާކިރު ވިދާޅުވީ، މާދަމާއަކީ، އައު އަހަރު ފެށޭ ދުވަސް ކަމަށް ވުމުން، އަދި އިތުރު ޖެޓުތަކެއް ރާއްޖެއަށް އަތުވެދާނެކަމަށެވެ.

މިދުވަސްވަރަކީ، ކޮންމެ އަހަރަކުވެސް ރާއްޖޭގެ ފަތުރުވެރިކަމަށް އެންމެ ނަފާވާ ދުވަސްވަރެވެ. މަޝްހޫރު އެތައް ޝަހުސިއްޔަތުތަކެއް ރާއްޖެއައިސް އެތައް ހާސް ޑޮލަރެއް ހޭދަކުރުމުގެ އިތުރުން އެމީހުންގެ ސޯޝަލް މީޑިއާގައި ރާއްޖެ އިޝްތިހާރުވެސް ކުރެއެވެ.