ސައުދީއިން ރާއްޖެއަށް ހަމަޖައްސާފައިވާ ސަފީރު އަސްލަމްއާއި ބައްދަލުކުރައްވައިފި

ސައުދީއިން ދިވެހިރާއްޖެއަށް ހަމަޖައްސާފައިވާ ސަފީރު، މަތުރެކް ބިން އަބްދުﷲ ރައްޔިތުންގެ މަޖިލީހުގެ ރައީސް މުޙައްމަދު އަސްލަމްއާއި ބައްދަލުކުރައްވައިފިއެވެ.

ސައުދީ ސަފީރު އަސްލަމްއާއި ބައްދަލުކުރެއްވުމަށް ވަޑައިގަންނަވާފައިވަނީ ރައްޔިތުންގެ މަޖިލީހަށެވެ.

އަދި ހަމައެހެންމެ، 2 ޤައުމުގެ ގުޅުން އިތުރަށް ބަދަހިކުރުމަށްޓަކައި ކުރެވިދާނެކަންކަމާއި ބެހޭގޮތުން ޚިޔާލު ބަދަލުކުރައްވާފައިވެއެވެ. އަދި މީގެ އިތުރުން، އިސްލާމް ދީނުގެ ކަންކަން ދެމެއްތުމާއި ދީން ހިމާޔަތް ކުރުމަށްޓަކައި އެޅޭނެ ފިޔަވަޅުތަކާއި ބެހޭގޮތުން މަޝްވަރާކުރައްވާފައިވެއެވެ.

އެގޮތުން ސައުދީ ސަރުކާރުން ރާއްޖެއަށް ކޮށްދެއްވަމުން ގެންދަވާ ކަންކަމަށް އަސްލަމް ޝުކުރުދަންނަވާފައިވެއެވެ. އަދި މީގެއިތުރުން ސައުދީ ސަފީރު ވިދާޅުވީ، ދެ ޤައުމުގެ ތާރީޚީ އާދަކާދަތަށް ދެމެހެއްޓުން މުހިއްމު ކަމަށެވެ. ދެ ޤައުމުގެ ޤާނޫނު ހަދާ މަޖިލީހުގެ ގުޅުން އިތުރަށް ވަރުގަދަ ކުރެއްވުމާއި ބެހޭގޮތުންވެސް މި ބައްދަލުވުމުގައި ވަހަކަފުޅު ދައްކަވާފައިވެއެވެ.

މިއަދު ރައްޔިތުންގެ މަޖިލީހުގައި ކުރިޔަށްދިޔަ ބައްދަލުވުމުގައި، ސައުދީ ސަރުކާރުން ރާއްޖެއަށް އެހީތެރިވުމުގައި ދެމިހުންނާނެކަމުގެ ޔަގީންކަން ސައުދީ ސަފީރު ދެއްވާފައިވެއެވެ. އެގޮތުން، ތަޢުލީމީ ދާއިރާއާއި ސިއްޙީ ދާއިރާ އިތުރަށް ފުޅާކޮށް، ކުރިއެރުވުމަށްޓަކައި އެޅޭނެ ފިޔަވަޅުތަކާއި ބެހޭ މަޝްވަރާތައްވެސް ދެ ބޭފުޅުން ކުރައްވާފައިވެއެވެ.