މިނިސްޓަރުންގެ ނައިބު ކަމަށް އިތުރު 17 ބޭފުޅުން އައްޔަންކޮށްފި

މިނިސްޓަރުންގެ ނައިބުގެ މަޤާމަށް މިއަދު 17 ބޭފުޅަކު އައްޔަންކޮށްފިއެވެ.

ރައީސް އޮފީހުން މިއަދު ހާމަކުރި މައުލޫމާތަށް ބަލާއިރު ޑެޕިއުޓީ މިނިސްޓަރުންނަށް މިއަދު އައްޔަންކުރެއްވި ބޭފުޅުންގެ ތެރޭގައި ގިނައިން ހިމެނެނީ އަންހެން ބޭފުޅުންނެވެ.

މި ސަރުކާރުގައި 22 މިނިސްޓްރީއެއް އޮންނާނެއެވެ. އެމިނިސްޓްރީތަކަށް އައްޔަންކުރެވޭ މިނިސްޓަރުންނާއި ނައިބުން މީގެ ކުރިން ދެ ފަހަރެއްގެ މަތިން އައްޔަންކުރައްވާފައިވެއެވެ. އެގޮތުން، އިއްޔެ 18 ބޭފުޅުން އަދި އޭގެ ކުރީ ދުވަހު 26 ބޭފުޅުންނެވެ. މިއަދު އަލަށް އައްޔަންކުރެއްވި 17 ބޭފުޅުންނާ އެކު މިނިސްޓަރުންގެ ނައިބުންގެ ޖުމްލަ އަދަދު 61އަށް ވަނީ އަރާފައެވެ.

ސިޔާސީ މަގާމުތަކުގައި ތިއްބަވާ މުވައްޒަފުންގެ އަދަދު 700 އަށް ވުރެ އިތުރު ނުކުރައްވާނެ ކަމަށް ރައީސް މުއިއްޒު މީގެކުރިން ވަނީ ވިދާޅުވެފައެވެ.