ކޮމިޝަނަރ އޮފް ޕޮލިސް ގެ މަގާމަށް ވަކި ފަރާތަކު ޢައްޔަންކުރައްވަންދެން ފުލުހުންގެ މުއައްސަސާގެ ހިންގުމާއި ވަގުތީގޮތުން ހަވާލުވެ ހުންނެވި، ފަރުހާދު ފިކުރީ އެކްޓިންގް ކޮމިޝަނަރުގެ މަގާމަށް ހަމަޖައްސައިފިއެވެ.
ދިވެހި ފުލުހުންގެ ޚިދުމަތުގެ ޤާނޫނު (34/2020)ގެ 57 ވަނަ މާއްދާގެ 'ށ'ގައިވާގޮތުން ކޮމިޝަނަރ އޮފް ޕޮލިސްގެ މަޤާމު ހުސްވެއްޖެނަމަ، އެ މަޤާމު ހުސްވާ ތާރީޚުން ފެށިގެން 45 ދުވަހުގެ ތެރޭގައި، އެ މަޤާމަށް މީހަކު ޢައްޔަންކުރަންވާނެއެވެ.
ދާޚިލީ ސަލާމަތާ ބެހޭ ވަޒީރު ވަޒީރު އަލީ އިހުސާން ވިދާޅުވީ، އަވަސް ތާރީޚެއްގައި ކޮމިޝަނަރ އޮފް ޕޮލިސްގެ މަގާމަށް ފުލުހަކު ޢައްޔަންކުރައްވާނެކަމަށެވެ. އަދި މީގެ އިތުރުންވެސް، ކޮމިޝަނަރ އޮފް ޕޮލިސް ގެ މަގާމަށް ވަކި ބޭފުޅަކު ޢައްޔަން ކުރެވެންދެން އެ މަގާމުގެ މަސްއޫލިއްޔަތުތަކާއި ހަވާލުވެގެން މަސައްކަތް ކުރަމުން ގެންދަވާނީ ފަރުހާދު ކަމަށެވެ.
އެކްޓިންގް ކޮމިޝަނަރ އޮފް ޕޮލިސް ގެ މަގާމަށް ފަރުހާދު ހަމަޖައްސައިފައިވަނީ ޑެޕިއުޓީ ކޮމިޝަނަރުންގެ ގޮތުގައި ތިއްބެވި އަބްދުލްމަންނާން ޔޫސުފާއި، އަލީ ރަޝީދު އަދި ކޮމިޝަނަރ އޮފް ޕޮލިސް މުޙައްމަދު ޙަމީދު ފުލުހުންގެ ޚިދުމަތުން ރިޓަޔާ ކުރެއްވުމުންނެވެ.
ފަރުހާދަކީ، 2021 ވަނައަހަރުގެ އޯގަސްޓު 10ގައި ފުލުހުންގެ ވަޒީފާ އިން ވަކިކުރަން ނިންމާފައިވާ ބޭފުޅެކެވެ. އެފަހަރު ފަރުހާދު ފުލުހުންގެ ޚިދުމަތުން ވަކިކުރަން ނިންމާފައިވަނީ ފަރުހާދުގެ ރޭންކުން ފަރުހާދަށް ލިބިދީފައިވާ ބާރުގެ ބޭނުން ނަހަމަގޮތުގައި ބޭނުން ކުރިކަން ފުލުހުންގެ ތަޙުޤީޤަށް ފެނުމުންނެވެ. ނަމަވެސް ފަރުހާދު ވަކިކުރުމަށް ނިންމާފައިވާ ނިންމުމަކީ ގޯސް ނިންމުމެއްކަމަށް ދިވެހިރާއްޖޭގެ ސިވިލް ކޯޓުން ނިންމައި، ފަރުހާދު އަނބުރާ ވަޒީފާއަށް ނެރެފައިވެއެވެ. ސިވިލް ކޯޓުގެ ނިންމުމާއި ގުޅިގެން އެޓާނީ ޖެނެރަލްގެ އޮފީހުން އެ މައްސަލަ ހައިކޯޓުގައި އިސްތިއުނާފު ކޮށްފައިވެއެވެ. ނަމަވެސް، އެކަމާއި ގުޅިގެން ހައިކޯޓުން ވަކި ހުކުމެއް އިއްވަވާފައެއް ނުވެއެވެ.
