އުރީދޫ ޑްރޯން ރޭހަށް ރަޖިސްޓްރީވުމުގެ ފުރުސަތު ހުޅުވާލައިފި

ރާއްޖޭގައި ފުރަތަމަ ފަހަރަށް ބާއްވާ އުރީދޫ ޑްރޯން ރޭސް 2023 އަށް ރަޖިސްޓްރީވުމުގެ ފުރުސަތު ހުޅުވާލައިފިއެވެ.

ފަން ރަން އާއެކުގައި އަންނަ މަހުގެ 22 ވަނަ ދުވަހު ހުޅުމާލޭ ސެންޓްރަލް ޕާކުގައި ބާއްވާ މި ރޭހުގައި ބައިވެރިވާން ބޭނުންވާ ފަރާތްތަކަށް މި ފުރުސަތު އުރީދޫން މިވަނީ ހުޅުވާލާފައެވެ.

މި ރޭހުގައި ބައިވެރިވާން ބޭނުންވާ ފަރާތްތަކުން http://ore.do/dronerace މެދުވެރިކޮށް ބައިވެރިވެވޭނެއެވެ. ބައިވެރިވުމުގެ ފުރުސަތު ހުޅުވާލާފައިވަނީ ޑިސެމްބަރު 10 އާ ހަމައަށެވެ.

އުރީދޫން ބުނާގޮތުން މިރޭސް ކުރިޔަށްދާނީ ދެ ކެޓަގަރީއަކަށް ބަހާލައިގެންނެވެ. އެގޮތުން 16 އަހަރުން މަތީގެ ބައިވެރިންނަށް "އެކައި އެލީޓް" ކެޓަގަރީ، 12 އަހަރުން މަތީގެ ބައިވެރިންނަށް "ސްކައި ވޯކާ" ކެޓަގަރީއެވެ. އޮބްސްޓެކްލްލްސް ހިމެނޭހެން، ކުރިޔަށްގެންދާ މިރޭސް އެންމެ އަވަަހަށް ނިންމާ ފަރާތަކީ ރޭހުގެ އެއްވަނައަށް ދާ ފަރާތެވެ.

ސްކައި ވޯކާ ކެޓަގަރީގައި ޕްރީ ކޮލިފިކޭޝަން ރައުންޑެއް ކުރިއަށް ގެންދާއިރު، އެ ރައުންޑް ކުރިއަށް ގެންދާނެ ތާރީހާއި ގަޑި ރަޖިސްޓްރީ ކުރާ ފަރާތައް އަންގާނެ ކަމަށް އުރީދޫން ބުނެއެވެ.

އެ ދެ ކެޓަގަރީން މޮޅުވާ ފަރާތްތަކަށް އަގުބޮޑު އިނާމުތަކެއްވެސް ވަނީ ކަނޑައަޅައިފައެވެ. އެގޮތުން ސްކައި އެލީޓް ރޭހުން އެއްވަނަ ހޯދާ ފަރާތަކަށް ޑީޖީއޭ މިނީ 3 ޕްރޯ (ޑީޖީއޭ އާރްސީ) އެއް ލިބޭއިރު، ދެވަނަ ހޯދާ ފަރާތަކަށް 5ޖީ އެއާފައިބާ ޑިވައިސް އާއެކު 3 މަސް ދުވަހުގެ ހިލޭ ޕެކޭޖް (1536 ޖީބީ) ލިބެއެވެ. އަދި 3 ވަނައަށް ހޮވޭ ފަރާތަކަށް 2000 ރުފިޔާގެ މޫލީ ވައުޗާއެއް ލިބޭނެއެވެ.

ސްކައި ވޯކާ ކެޓަގަރީން އެއްވަނަ ހޯދާ ފަރާތަކަށް ޑީޖީއޭ މިނީ 2 އެސްއީއެއް ލިބޭއިރު ދެވަނަ ހޯދާ ފަރާތަކަށް 5ޖީ އެއާފައިބާ ޑިވައިސް އާއެކު 3 މަސް ދުވަހުގެ ހިލޭ ޕެކޭޖް (750ޖީބީ) ލިބޭނެއެވެ. ތިން ވަނައަށް ހޮވޭ ފަރާތަކަށް ލިބޭނީ 1000 ރުފިޔާގެ މޫލީ ވައުޗާއެކެވެ.