ތިލަމާލެ ބްރިޖު ލަސްވާ ވާހަކަ ދައްކާތީ އިންޑިއާއިން ކަންބޮޑުވެއްޖެ

މާލެއާއި ވިލިމާލެއާއި ގުޅީފަޅާއި ތިލަފުށި ގުޅުވައިލުމަށް ސަރުކާރުން ހިންގާ ތިލަމާލެ ބުރިޖު މަސައްކަތް ލަސް ވާހަކަ ރިޕޯޓު ކުރާތީ އިންޑިއާ ހައިކޮމިޝަނުން ކަންބޮޑުވެ، އެކަން ދޮގުކޮށްފި އެވެ.

އިންޑިއާގެ އެފްކޮންސް އިންފްރާސްޓްރަކްޗާ ލިމިޓެޑާއި ދިވެހި ސަރުކާރާއެކު ތިލަމާލެ ބްރިޖުގެ މަޝްރޫއުގެ އެއްބަސްވުމުގައި ސޮއިކުރީ 2021 ވަނަ އަހަރު އެވެ. އެ މަޝްރޫއު ނިންމަން އޮތް ޝެޑިއުލަށްވުރެ ލަސްކަން ދިވެހި ސަރުކާރުން ވެސް ވަނީ އެއްބަސްވެފަ އެވެ.

ބްރިޖުގެ 15 އިންސައްތަ މަސައްކަތް ވެސް އަދި ނިމިފައި ނުވާއިރު، ފިނޭންސް މިނިސްޓްރީގެ ހިސާބުތަކުން ދައްކާގޮތުން މިދިޔަ މަހުގެ ނިޔަލަށް އެ މަޝްރޫއަށް ސަރުކާރުންވަނީ ޖުމުލަ 3.9 ބިލިއަނާއި ގާތްކުރާ އަދަދަކަށް ހަރަދުކޮށްފަ އެވެ.

އެކަން ރިޕޯޓު ކުރުމާ ގުޅިގެން އިންޑިއާ ހައިކޮމިޝަނުން ރޭ އެކްސް ގައި ކުރި ޕޯސްޓެއްގައި ބުނީ، ބްރިޖުގެ ޓައިމްލައިން އާއި މަސައްކަތުގެ ޕްރޮގުރެސް އަދި ހަރަދު ރިޕޯޓުކޮށްފައިވަނީ ނުބައިކޮށް ކަމަށެވެ.

އިންޑިއާ ހައިކޮމިޝަނުން އެގޮތަށް ބުނި ނަމަވެސް ފިނޭންސް މިނިސްޓްރީގެ ތަފާސްހިސާބުތަކުން އެ ހަރަދު ސާފުކޮށް ފެންނަން އެބަ ހުއްޓެވެ. އަދި ތިލަމާލެ ބުރިޖުގެ މަޝްރޫއު ކަނޑައެޅިފައިވާ މުއްދަތަށް ނުނިންމުނު ކަމަށާއި އެކަމާ ދެރަވެވަޑައިގަންނަވާ ކަމަށް ރައީސް އިބްރާހީމް މުހައްމަދު ސޯލިހު ވެސް ވަނީ ވިދާޅުވެފަ އެވެ.

އިންޑިއާ ސަރުކާރުން ފަންޑުކޮށްގެން ތިލަމާލެ ބްރިޖު އަޅަނީ އިންޑިއާގެ 100 މިލިއަން ޑޮލަރުގެ ހިލޭ އެހީ އާއި 400 މިލިއަން ޑޮލަރުގެ ލޯނު ފައިސާއިންނެވެ. ރާއްޖޭގައި ހުންނަ އިންޑިއާ އެމްބަސީން ބުނެފައިވާ ގޮތުގައި 400 މިލިއަން ޑޮލަރަކީ އެ ގައުމުން ރާއްޖެއަށް ދިން 800 މިލިއަން ޑޮލަރުގެ ކްރެޑިޓް ލައިންގެ ބައެކެވެ.

އިންޑިއާއިން ވަނީ ތިލަމާލެ ބްރިޖު އަޅަން ހިލޭ އެހީގެ ގޮތުގައި އިތުރު 15 މިލިއަން ޑޮލަރު (ގާތްގަނޑަކަށް 231.3 މިލިއަން ރުފިޔާ) ވެސް ފަހުން ދީފަ އެވެ.

އިންޑިއާގެ އެގްޒިމް ބޭންކުން 400 މިލިއަން ޑޮލަރުގެ ލޯނެއް ނަގައިގެން ހިންގާ މި މަޝްރޫޢުގެ މަސައްކަތް އަވަސްކުރުމަށް ކަމުގައި ބުނެ ސަރުކާރުންވަނީ އެ ބޭންކުން އިތުރު 100 މިލިއަން ޑޮލަރުގެ ލޯނެއް ނަގާފައެވެ. މި މަޝްރޫޢަށް އިންޑިއާއިން ހަމަޖައްސައިދިން ހިލޭ އެހީގެ އަދަދަކީ 100 މިލިއަން ޑޮލަރެވެ. އެހެންކަމުން ޖުމްލަ މި މަޝްރޫޢަށް މިހާރު 600 މިލިއަން ޑޮލަރު ހޭދަވާނެއެވެ.

މި ސަރުކާރުން މިހާތަނަށް ފެށި އުމްރާނީ ތަރައްޤީގެ އެންމެ ބޮޑު މަޝްރޫޢަކީ ތިލަމާލެ ބުރިޖުގެ މަސައްކަތެވެ. ސަރުކާރުން ތަކުރާރުކޮށް ބުނަމުން އައީ ބުރިޖުގެ މަސައްކަތް ކަނޑައަޅާފައިވާ ތާވަލާ އެއްގޮތަށް ގެންގޮސް މި އަހަރުގެ ޖުލައި މަހުގެ ކުރިން ބުރިޖުގެ ފުރަތަމަ ބައިގެ މަސައްކަތް ނިންމައި އޯގަސްޓު މަހުގައި ބުރިޖުން ވިލިމާލެއަށް ދަތުރުކުރެވޭނެ ކަމަށެވެ.

ނަމަވެސް އޯގަސްޓު މަސް ނިމި އޮކްޓޯބަރު މަސް މެދެއްހާ ހިސާބަށް ދިޔައިރު ވެސް ބުރިޖުގެ މަސައްކަތުގެ ބޮޑު ބައެއް ނިންމައި ނުލެވެއެވެ.