ވިލިނގިލީގައި ރައީސާ ދެކޮޅަށް މުޒާހަރާކުރި މީހުންނަށް ފުލުހުން އަނިޔާކުރުން ޕީޕީއެމްއިން ކުށްވެރިކޮށްފި

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިލިނގިއްޔަށް ވަޑައިގަތުމުން އިދިކޮޅު ސަޕޯޓަރުން އިހުތިޖާޖުކުރުމުން އެ މީހުންނަށް ފުލުުހުން އަނިޔާކުރުން އިދިކޮޅު އިއްތިހާދުން ކުށްވެރިކޮށްފިއެވެ.

އެ އިއްތިހާދުން މިއަދު ނެރުނު ބަޔާނެއްގައި ބުނީ އެ އިއްތިހާދުގެ ލީޑަރު ރައީސް ޢަބްދުﷲ ޔާމީނާއި އެމަނިކުފާނުގެ އާއިލާއަށް ނުހައްގުން އަނިޔާކުރަމުން، އަދި އެމަނިކުފާނު ޖަލުގައި ބަންދުކޮށްފައި، ރައީސް އިބްރާހީމު ގއ.ވިލިނގިއްޔަށް ވަޑައިގެން މިނިވަންކަމާއެކު ކެމްޕެއިން ކުރައްވާތީ އެކަމާ ދެކޮޅަށް ރައްޔިތުން ސުލްހަވެރިކަމާއެކު އިހުތިޖާޖުކުރި ކަމަށެވެ.

އިހުތިޖާޖުކުރި ރައްޔިތުންނާ ދެކޮޅަށް ފުލުހުން މެދުވެރިކޮށް ހާލަތާ ނުބައްދަލު ބާރުގެ ބޭނުންކުރިކަމަށާއި، އެކަން އިދިކޮޅު ކޯލިޝަނުން ހަރުކަށި އިބާރާތުން ކުށްވެރިކުރާކަމަށް އެ ބަޔާނުގައި ނެރެފައިވެއެވެ.

"އަދި ޤާނޫނުއަސާސީއާއި ޤާނުނު ތަކުން ދިވެހި ރައްޔިތުންނަށް ލިބިދޭ ޚިޔާލުފާޅުކުރުމާއި އެއްވެ އުޅުމާއި އިޙުތިޖާޖު ކުރުމުގެ ޙައްޤަށް ސަރުކާރުން އަރައިގަނެ، މިކޯލިޝަންގެ އިސް ސަފުގައި މަސައްކަތް ކުރައްވާގއ. ވިލިނގިލީގެ 3 ބޭފުޅަކު އަނިޔާވެރިކަމާއެކު ހައްޔަރުކުރި ކުރުން މިކޯލިޝަނުން ބަލައިނުގަންނަ ވާހަކަ ދެންނެވިން،" އެ ބަޔާނުގައި ބުނެފައިވެއެވެ.

ޞުލްޙަވެރިކަމާއެކު ޚިޔާލުފާޅުކުރުމާއި އެއްވެއުޅުމަކީ ޤާނޫނުއަސަސީން ރައްޔިތުންނަށް ކަށަވަރުކޮށްދޭ އަސާސީ ޙައްޤެއްކަން ފާހަގަކޮށް އިދިކޮޅު ކޯލިޝަނުން ސަރުކާރަށް ގޮވާލާފައިވަނީ އެ އަސާސީ ޙައްޤުތަކަށް ހުރަސް ނޭޅުމަަށެވެ.

ހަމައެހެންމެ އިދިކޮޅު އިއްތިހާދުން ފުލުހުންނަށް އިލްތިމާސްކުރީ ސަރުކާރުން ކުރާ ޣައިރު ޤާނޫނީ އަމުރުތަކަށް ކިޔަމަންނުވުމަށެވެ. އަދި ރައީސް ޔާމީނާއި އެމަނިކުފާނުގެ އާއިލާއަށް ކުރާ އަނިޔާތައް ހުއްޓާލައި، އެމަނިކުފާނު މިހާރުން މިހާރަށް މިނިވަންކުރަން އިދިކޮޅުން ގޮވައިލިއެވެ.