ޑިމޮކްރެޓްސް އިން ރައިސަށް ގިނަ ތުހުމަތުތަކެއް ކޮށް އިނގިރޭސިން ބަޔާނެއް ނެރެފި

ރައީސް އިބްރާހީމް މުހައްމަދު ސޯލިހަށް ފުލުހުންގެ މުއައްސަސާގެ މައްޗަށް ލިބިފައިވާ ބާރު ނުހަމަ ގޮތުގައި ބޭނުންކޮށް، އިދިކޮޅު ފަރާތްތައް ހުއްޓުވާ ކަމަށާއި، ކެމްޕެއިނަށް ފައިސާ ބަހަމުންދާ ކަމަށް ބުނެ ޑިމޮކްރެޓްސް އިން ސަރުކާރަށް ގިނަ ތުހުމަތުތަކެއް ކޮށްފި އެވެ.

އެ ޕާޓިން އިނގިރޭސި ބަހުން މިއަދު ނެރުނު ބޮޑު ބަޔާނެއްގައި ބުނީ އެމްޑީޕީގެ ރިޔާސީ ކެންޑިޑޭޓުގެ ހައިސިއްޔަތުން ރައީސް އިބްރާހީމް މިހާރު އަތޮޅުތެރެއަށް ކުރައްވަމުން ގެންދަވާ ކެމްޕެއިން ދަތުރުތަކުގައި، އެމަނިކުފާނު ވަޑައިގަތުމުގެ ކުރިން ރަށްރަށަށް އެސްއޯ އަދި ރިއޮޓް ޕޮލިހުން ފޮނުވަމުންދާ ކަމަށެވެ.

އެގޮތުން މިދިޔަ ހޯމަ ދުވަހު ރައީސް ދ. ކުޑަހުވަދޫއަށް ވަޑައިގެންނެވި ވަގުތު، އަމިއްލަ ގޭގައި ލައުޑް ސްޕީކަރު ހަރުކޮށްގެން ރައީސާ ދެކޮޅަށް މުޒާހަރާ ކުރަމުންދިޔަ އެރަށު ކައުންސިލް މެންބަރު އަހްމަދު މައުރޫފް ގޭގެ ތެރެއިން ހައްޔަރު ކުރިކަން ބަޔާނުގައި ފާހަގަކުރި އެވެ.

އަދި ރައީސާ ދެކޮޅަށް އެރަށުގައި ކުރި ސުލްހަވެރި މުޒާހަރާގެ ތެރެއިން އިތުރު ކައުންސިލް މެންބަރަކު ހައްޔަރުކުރިކަން ފާހަގަކޮށްފައިވެ އެވެ.

ރަށްރަށުގައި ރައީސާ ދެކޮޅަށް މުޒާހަރާ ކުރާ މީހުން ހައްޔަރުކުރުމުގެ އިތުރުން، ރައީސް ރަށަކަށް ވަޑައިތުމުގެ ކުރިން އެރަށެއްގެ އިދިކޮޅު ފަރާތްތައް ގަދަބާރުން ރައީސް ވަޑައިގަންނަވާ ސަރަހައްދުތަކުން ދުރަށް ގެންދާ ކަމަށްވެސް ބަޔާނުގައި ބުނެފައިވެ އެވެ.

އެގޮތުން މިދިޔަ މަހު 31 ގައި ށ. ބިލެއްފަހިއަށް ރައީސް ވަޑައިގެންނެވި އިރު އެމަނިކުފާނުގެ ކެމްޕެއިން ޖަލްސާ އޮތް ސަރަހައްދުގައި ހުރި ކެފޭއެއްގައި ތިބި އިދިކޮޅު ފަރާތްތައް ފުލުހުން ލައްވައި ގަދަބާރުން ފައްސާލާފައިވާ ކަން ފާހަގަކުރި އެވެ.

އަދި ތާއީދު ނުކުރާތީ އެމަނިކުފާނު ވަޑައިގަންނަވަންވާއިރަށް ފުވައްމުލަކު ގެއެއްގެ ކުރިމަތީގައި ފިލާ ޖަހައި ބަންދުކުރި ކަމާއި، ފުލުހުންގެ ފައުޖެއް ފުވައްމުލަކުގެ ރެސްޓޯރެންޓަކަށް ވަދެ ބައެއް އާންމު ރައްޔިތުންނާ ކުރިމަތިލާ އެ ފަރާތްތަކަށް އަނިޔާކުރިކަން ފާހަގަކުރި އެވެ.

އޭގެ އިތުރުން ގދ. ގައްދޫއަށް ރައީސް ވަޑައިގަތުމުގެ ކުރިން އެރަށުގައި ހުރި އިދިކޮޅުގެ ބެނާތައް ފުލުހުން ލައްވައި ކަނޑާލުމާއެކު، މުޒާހަރާކުރި ފަރާތްތަކާ ދެކޮލަށް ހާލަތާ ނުބައްދަލު ބާރުގެ ބޭނުންކުރި ކަމަށް ބަޔާނުގައި ބުނެފައިވެ އެވެ.

"ރާއްޖޭގައި ކުރާ މުޒާހަރާތަކަކީ ސުލްހަވެރި މުޒާހަރާތަކެއް އަދި އެ މުޒާހަރާތަކުގެ ސަބަބުން ރައީސަށް ނުރައްކަލެއް ކުރިމަތިވެފައި ނުވޭ. ވީއިރު، މުޒާހަރާގެ ބައިވެރިންނާ ދެކޮޅަށް ރިއޮޓް ގިއާ ފުލުހުން ފޮނުވުމަކީ ނުރައްކާތެރި އަދި ކަންބޮޑުވުން އޮތް ކަމެއް،" ޑިމޮކްރެޓްސްގެ ބަޔާނުގައި ބުނެފައިވެ އެވެ.

ބަޔާނުގައި އިތުރަށް ވަނީ ރައީސް އިބްރާހީމްގެ ކެމްޕެއިންތަކުގައި އިދިކޮޅު ފަރާތްތަކާ ދެކޮޅަށް ފުލުހުން ބޭނުންކުރުމުގެ އިތުރުން، ކެމްޕެއިނަށް ދައުލަތުގެ ވަސީލަތްތައް ބޭނުންކުރާކަން ވެސް ފާހަގަކޮށްފަ އެވެ.

އަދި ސަރުކާރު ހިއްސާވާ ކުންފުނިތަކުން ސްޕޮންސާ ފައިސާ ދީގެން ނޫސްތައް ހިސޯރުކޮށްފައިވާ ކަމާއި، ވޯޓުދޭ މަތިން ރައްޔިތުންނަށް ފައިސާ ބަހަމުންދާ ކަމަށް ވެސް ބަޔާނުގައި ބުންޏެވެ.

"ވޯޓަށާއި އެހެންނިހެންވެސް ކަންކަމަށް ރިޝްވަތު ފައިސާ ބެހުމަކީ އާދައިގެ ކަމަކަށް ރައީސް އިބްރާހީމް ހައްދަވައިފި. އެމްޑީޕީގެ އެތެރޭގެ އިންތިހާބުތަކާއި ރިޔާސީ އިންތިހާބާ ދިމާކޮށްވެސް މަޖިލިސް މެންބަރުންނާއި މިނިސްޓަރުން މެދުވެރިކޮށް ސަރުކާރުން ހާމަކަން ބޮޑުކޮށް ފައިސާ ބަހަމުންދާކަން ވަނީ ހާމަވެފަ،" ބަޔާނުގައި ބުނެފައިވެ އެވެ.

ސަރުކާރު ހިންގާ މައި ޕާޓީ އެމްޑީޕީން ވަކިވެ، އާ ޕާޓީ އުފައްދައިގެން އުޅުއްވާ ޑިމޮކްރެޓްސް އިން މި ތުހުމަތުތައް ކުރި އިރު، މީގެ ކުރިން އިދިކޮޅު ޕީޕީއެމް/ޕީއެންސީގެ ފަރާތްތަކުން ވެސް ވަނީ ސަރުކާރަށް މި ތުހުމަތުތައް ތަކުރާރުކޮށް ކޮށްފަ އެވެ.