ދިވެހި ދައުލަތުގެ ބޭރު ފައިސާގެ ރިޒާވްގައި ހުރި ބޭނުން ކުރެވޭ ގޮތަށް ހުރި ފައިސާގެ އަދަދު ވަރަށް ބޮޑަށް ދަށްވެއްޖެއެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އާންމުކޮށްފައިވާ ހިސާބުތަކުން ދައްކާގޮތުން ފާއިތުވި ޖުލައި މަހުގެ ނިޔަލަށް ޖުމްލަ ރިޒާވްގެ ގޮތުގައި ހުރީ 594 މިލިއަން ޑޮލަރެވެ. އޭގެ ތެރެއިން ބޭނުން ކުރެވޭ ގޮތަށް ހުރީ 125 މިލިއަން ޑޮލަރެވެ. އޭގެ ކުރީ މަސް ނިމުނު އިރު ބޭނުން ކުރެވޭ ގޮތަށް ހުރީ 168 މިލިއަން ޑޮލަރެވެ. އެހެން ކަމުން 1 މަސް ތެރޭގައި ރިޒާވުން މިވަނީ 43 މިލިއަން ޑޮލަރު މަދުވެފައެވެ.
ޖުލައި މަހަކީ މި އަހަރު ފެށުނު ފަހުން ޖުމްލަ ރިޒާވް އަދި ބޭނުން ކުރެވޭ ރިޒާވްވެސް އެންމެ ދަށަށް ދިޔަ ފަހަރެވެ. މިދިޔަ އަހަރުގެ މި މުއްދަތުގައިވެސް ރިޒާވް މިހާ ދަށެއް ނޫނެވެ.
2022 ވަނަ އަހަރުގެ ޖުލައި މަސް ނިމުނު އިރު ޖުމްލަ ރިޒާވްގައި 728 މިލިއަން ޑޮލަރު ހުއްޓެވެ. އަދި އޭގެ ތެރެއިން 282 މިލިއަން ޑޮލަރު ހުރީ ބޭނުން ކުރެވޭ ގޮތަށެވެ.
