ފުލުހުން ނޫސްވެރިންނަށް އަނިޔާ ކުރި މައްސަލަ އައިއެފްޖޭ އިން ކުށްވެރިކޮށްފި

މިދިޔަ ހަފްތާގައި އިދިކޮޅު ފަރާތްތަކުން ޖުމްހޫރީ މައިދާނުގައި ތިބެގެން ކުރިއަށް ދިޔަ މަޝްވަރާއެއް ކަވަރު ކުރަމުން ދިޔަ ނޫސްވެރިންތަކަކަށް ފުލުހުން އަނިޔާކުރި މައްސަލަ ބައިނަލްއަޤްވާމީ ނޫސްވެރިންގެ ޖަމިއްޔާއެއް ކަމަށްވާ އިންޓަނޭޝަނަލް ފެޑެރޭޝަން އޮފް ޖާނަލިސްޓްސް (އައިއެފްޖޭ) އިން ކުށްވެރިކޮށްފިއެވެ.

އެ ޖަމިއްޔާއިން ނެރުނު ބަޔާނެއްގައި ވަނީ އެ ދުވަހު ފުލުހުން އަމަލުކުރި ގޮތް ކުށްވެރިކޮށް އަދި އެކަން ބެލުމަށް ސަރުކާރަށް ގޮވާލާފައެވެ.

އެ ދުވަހު ފުލުހަކު ވަނީ ޗެނަލް13 ގެ ނޫސްވެރިއެއް ކަމަށްވާ މިސްބާހު ކޮށްޕާލާފައެވެ. އަދި އޭނާ ގޮސް ޖެހުނީ ސަންގުޓީވީގެ ނޫސްވެރިއެއް ކަމަށްވާ މާތު ގައިގައެވެ. އަދި އެ ދެމީހުންވެސް ބިންމައްޗަށް ވެއްޓުނެވެ.

އެ މަންޒަރު ފެންނަ ވީޑިއޯއެއް ސޯޝަލް މީޑިއާގައި އާންމުވެފައިވާއިރު ގިނަ ބަޔަކުގެ ނުރުހުން ފުލުހުންނާއި ސަރުކާރަށް އެކަމުގެ ސަބަބުން އަމާޒުވިއެވެ.

ރައީސް އިބްރާހީމް ވެރިކަމަށް ވަޑައިގެންނެވިފަހުން ފުލުހުން ނޫސްވެރިންނަށް ހުރަސްއެޅުން ވަނީ ވަރަށް އާންމުކަމަކަށް ވެފައެވެ.