ދައުލަތުގެ އިންޝުއަރެންސް ސްކީމް އާސަންދައަށް މިއަހަރަށް ކަނޑައެޅި ބަޖެޓު ހުސްވެއްޖެއެވެ.
މިއަހަރު އާސަންދައަށް ކަނޑައަޅާފައިވަނީ 1.045 ބިލިއަން ރުފިޔާގެ ބަޖެޓެކެވެ. މިއަދު ފިނޭންސް މިނިސްޓްރީން އާންމުކޮށްފައިވާ ހިސާބުތަކަށް ބަލާއިރު 6 ޖުލައިގެ ނިޔަލަށް އާސަންދައަށް ވަނީ 1.154 ބިލިއަން ރުފިޔާ ހަރަދުވެފައެވެ. އެހެން ކަމުން މިހާރު މިއަހަރަށް ކަނޑައެޅި ބަޖެޓަށްވުރެ 100 މިލިއަން ރުފިޔާ އިތުރަށް ވަނީ ހަރަދުކުރެވިފައެވެ.
އާސަންދައިގެ ވަރަށް ބޮޑު އިންސައްތައެއް މިހާރު ހޭދަކުރަންޖެހެނީ އިންޑިއާގެ އެކިއެކި ހޮސްޕިޓަލްތަކަށް ފައިސާ ދެއްކުމަށެވެ. އައިޖީއެމްއެޗްގެ ވަރަށް ހިދުމަތްތައްވެސް އިންޑިއާގެ ހޮސްޕިޓަލްތަކަށް އައުޓްސޯސްކޮށް އެ ހޮސްޕިޓަލުން ހޯދާ ފަރުވާތަކަށްވެސް އިންޑިއާގެ ހޮސްޕިޓަލްތަކުން ދަނީ ބޮޑު އަގު ޗާޖު ކުރަމުންނެވެ.