ޑިމާންޑް ބޮޑު ލެއާއޯ މިލާންގައި މަޑުކުރަން ނިންމައިފި

ބޮޑެތި ކްލަބްތަކުގެ ސަމާލުކަން ހޯދާފައިވާ ރަފައެލް ލެއާއޯ އޭސީ މިލާނުގައި މަޑުކުރަން ނިންމައި އާ އެއްބަސްވުމުގައި ސޮއިކޮށްފި އެވެ.

އާ އެއްބަސްވުމުގެ ދަށުން 2028 ވަނަ އަހަރާއި ހަމައަށް ލެއާއޯ މިލާންގައި މަޑުކުރާނެ އެވެ. 23 އަހަރުގެ ޕޯޗުގަލް ވިންގާ، އަކީ މިދިޔަ އަހަރުތަކުގައި ބޮޑު ކުރިއެރުމެއް ހޯދި ކުޅުންތެރިއެކެވެ.

ލެއާއޯ މިލާންއާ އެކު ހަދާފައިވާ އެއްބަސްވުން ހަމަވާން ކުރިން އޮތީ އަންނަ އަހަރު އެވެ. އެކަމަކު އޭނާ ހޯދުމުގެ ރޭހަށް ބޮޑެތި ކްލަބްތައް ވަންނަން ޝައުގުވެރިކަން ފާޅުކުރުމުން މިލާނުން އެއްބަސްވުން އާކުރީ އެވެ. ލެއާއޯ ހޯދުމަށް މީގެކުރިން ޝައުގުވެރިކަން ފާޅުކުރި އެއް ކްލަބަކީ ޗެލްސީ އެވެ.

ޕޯޗުގަލްގެ ސްޕޯޓިން ލިސްބަން އިން ކެރިއަރު ފަށައި ލެއާއޯ ފަހުން ވަނީ ފްރާންސްގެ ލިލް އަށް ބަދަލުވެފަ އެވެ. އެ ކްލަބުގައި ދެއްކި މޮޅު ކުޅުމާ އެކު މިލާނުން ލެއާއޯގެ ސޮއި ހޯދީ 2019 ވަނަ އަހަރު އެވެ. މިލާނަށް މިހާތަނަށް ކުޅުނު 162 މެޗުގައި ލެއާއޯ ވަނީ 41 ގޯލު ޖަހައިފަ އެވެ.

މިދިޔަ ސީޒަނުގައި މިލާނުން އިޓާލިއަން ލީގު ކާމިޔާބު ކުރިއިރު ލެއާއޯ މޮޅު ކުޅުމެއް ދެއްކި އެވެ. 2011 ގެ ފަހުން މިލާނުން ފުރަތަމަ ފަހަރަށް ހޯދި ލީގުގެ މޮޅު ކުޅުންތެރިޔާގެ މަގާމް ވެސް ހޯދީ އޭނާ އެވެ.

މި ސީޒަނުގައި ވެސް ސްޓެފަނޯ ޕިއޯލީ ކޯޗުކޮށްދެމުން އަންނަ މިލާން ޓީމުގައި ލެއާއޯ މޮޅު ކުޅުމެއް ދެއްކި އެވެ. މިލާން ވަނީ މި ސީޒަނުގެ ގަދަ ހަތަރެއް ކަށަވަރުކޮށް ޔޫއެފާ ޗެމްޕިއަންސް ލީގުގެ ސެމީ ފައިނަލަށް ދަތުރުކޮށްފަ އެވެ.

ލެއާއޯ އަކީ މިހާރު ޕޯޗުގަލްގެ ގައުމީ ޓީމުން ވެސް ގަވައިދުން ޖާގަ ހޯދަމުން އަންނަ ކުޅުންތެރިއެކެވެ. މިދިޔަ ޑިސެމްބަރު މަހު ގަތަރުގައި ނިމުނު ފީފާ ވޯލްޑް ކަޕްގައި ލެއާއޯ ޕޯޗުގަލް ޓީމަށް ކުޅެ ގޯލު ޖެހި އެވެ.