ބްރޯޑްކޮމްގެ މެންބަރުކަމަށް ޞަފާ އައްޔަންކުރައްވައިފި

މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް)ގެ މެންބަރުކަމަށް ޞަފާ ޝަފީގު އައްޔަންކުރައްވައިފިއެވެ.

ޞަފާ ބްރޯޑްކޮމްގެ މެންބަރުކަމަށް އައްޔަންކުރައްވާ މަގާމުގެ ލިޔުން ހަވާލުކުރެއްވީ ރައީސް އޮފީހުގައި މިއަދު އެކަމަށްޓަކައި ހާއްސަކޮށްގެން ބޭއްވި ރަސްމިއްޔާތެއްގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހްއެވެ.

ޞަފާ ވަނީ ދިވެހިރާއްޖޭގެ ޤައުމީ ޔުނިވާސިޓީން މާސްޓާ އޮފް އާޓްސް އިން ސޯޝަލް ޕޮލިސީ، އަދި ލިމްކޮކްވިންގް ޔުނިވަރސިޓީ އޮފް ކްރިއޭޓިވް ޓެކްނޮލޮޖީއިން މާސްޓާ އޮފް ކޮމިއުނިކޭޝަން ހާސިލުކުރައްވާފައެވެ.

ޞަފާ ވަނީ 2006 ވަނަ އަހަރުން ފެށިގެން، ޓީވީއެމްގެ ޕްރޮގްރާމްތައް ހުށައަޅުއްވަން ފަށްޓަވައިފައެވެ. އެންމެ ފަހުން އޭނާ ހުންނެވީ، ޕަބްލިކް ސަރވިސް މީޑިއާގެ ޓީވީއެމްގެ ޕްރެޒެންޓަރުގެ މަޤާމުގައެވެ.

އޭނާ ބްރޯޑްކޮމްއަށް އައްޔަންކުރަން ރައްޔިތުންގެ މަޖިލީހުން ރުހުންދިނީ މިދިޔަ މަހުގެ 26 ވަނަ ދުވަހުއެވެ. ބްރޯޑްކޮމްއަށް ޞަފާ އައްޔަންކުރަން ފެންނަކަމަށް މަޖިލީހުގެ 40 މެންބަރުން ވޯޓު ދެއްވާފައިވެއެވެ.