މަޖިލީހުގެ ކުރީގެ ނައިބު ރައީސް، މޫސާ މަނިކު (ރީކޯ)ގެ އާއިލީ ކުންފުނިން ހިންގާ "ރަހާ" ރިސޯޓުގެ ވަޒީފާއިން ވަކިވާ ބިދޭސީ މުވައްޒަފުންގެ ވިސާ ކެންސަލް ނުކޮށްދޭ މައްސަލަތަކެއް ފެންމަތިވެއްޖެ އެވެ.
އެތަނުގެ ވަޒީފާއިން ވަކިވި ބިދޭސީ މުވައްޒަފަކު "ދިޔަރެސް" އަށް މައުލޫމާތު ދިން ގޮތުގައި އޭނާ ހިމެނޭހެން ފަސް މީހެއްގެ ވިސާ ކެންސަލް ކޮށްދިނުމަށް ރަހާ ރިސޯޓުން އަންނަނީ ދެކޮޅު ހަދަމުންނެވެ. އޭގެ ތެރޭގައި ހިމެނެނީ ލަންކާ ރައްޔިތަކާއި، އިންޑިއާ ރައްޔިތަކާއި، ކަޒަކިސްތާންގެ ރައްޔިތެއް އަދި ފިލިޕީންގެ ދެމީހުންނެވެ.
ވިސާ ކެންސަލް ނުކޮށްދޭތީ، ރާއްޖޭގެ އިތުރު ރިސޯޓަކުން ވަޒީފާ ލިބުނު ނަމަވެސް އޭގެ ތެރެއިން ދެމީހަކަށް ތިބީ އަލުން ރާއްޖެ ނާދެވިފަ އެވެ. އޭގެ ސަބަބުން އަނެއް ރިސޯޓުން ލިބުނު ވަޒީފާގެ ފުރުސަތުވެސް ގެއްލިދާނެ ކަމަށާއި، ކެރިއާއަށް އަސަރު ކުރާނެތީ އެމީހުން ކަންބޮޑުވުން ފާޅުކުރި އެވެ.
އޭނާ ބުނި ގޮތުގައި ވިސާ ކެންސަލް ނުކުރުމުގެ އިތުރުން އެމީހުންނަށް ފާއިތުވި ދެ މަސް ދުވަހުގެ އަދި ބައެއް މީހުންނަށް ތިން މަހުގެ މުސާރަވެސް ނުދީ އެބަ އޮތެވެ.
ދެހާސް ނަވާރަ ވަނަ އަހަރު ހުޅުވި ރަހާ ރިސޯޓު ތަރައްގީ ކުރުމަށް ބޭންކް އޮފް މޯލްޑިވްސް އިން ނެގި 11 މިލިއަން ޑޮލަރުގެ ލޯނު ނުދައްކައިގެން ބޭންކުން ކޯޓަށް ދިއުމުން، ކޯޓުން ވަނީ ރަހާ ރިސޯޓު ވިއްކާލުމުގެ ހުއްދަ ވެސް މިހާރު ބޭންކަށް ދީފަ އެވެ.