ތާރީހުގައިވެސް އެންމެ ގިނައިން ޖޫރިމަނާ ފައިސާ ހޯދީ މި ސަރުކާރުން: ޝައުނާ

ދިވެހި ސަރުކާރުތަކުގެ ތާރީހުގައިވެސް ތިމާވެއްޓާ ގުޅުންހުރި މައްސަލަތަކުގައި، ޖޫރިމަނާކޮށްގެން ސަރުކާރަށް ހޯދުނު އެންމެ ގިނަ ފައިސާ ހޯދީ މި ދައުރުގައި ކަމަށް އެންވަޔަރަމަންޓް މިނިސްޓަރު އައިމިނަތު ޝައުނާ ވިދާޅުވެއްޖެ އެވެ.

ވިލިމާލެ ފަރަށް ލިބުނު ގެއްލުމުގެ ޖޫރިމަނާ އެފްކޮންސް ކުންފުނިން ނުދައްކާތީ އެކަމާ ގުޅޭގޮތުން މަޖިލީހުގެ މިއަދުގެ ޖަލްސާގައި މެންބަރު މުހައްމަދު ސައީދު ކުރި ސުވާލަށް ޖަވާބުދެއްވަމުން ޝައުނާ ވަނީ އެ ޖޫރިމަނާ މާފު ނުކުރާނެ ކަމުގެ ޔަގީންކަން ދެއްވާފަ އެވެ.

އެގޮތުން ފާއިތުވި ހަތަރު އަހަރު ތެރޭގައި ތިމާވެއްޓާ ގުޅުންހުރި 40 މައްސަލައެއްގައި 600 މިލިއަނަށްވުރެ ގިނަ ރުފިޔާއިން އެކި ފަރާތްތައް ޖޫރިމަނާކޮށްފައިވާ ކަމަށާއި، އޭގެ ތިންބައިކުޅަ އެއްބައި ފައިސާ މިހާތަނަށް ހޯދިފައިވާ ކަމަށް ވިދާޅުވި އެވެ.

"މިއީ ދިވެހި ސަރުކާރުގެ ތާރީހުގައިވެސް ޖޫރިމަނާކޮށްގެން ސަރުކާރަށް ހޯދުނު އެންމެ ގިނަ ފައިސާ ކަންވެސް އަޅުގަނޑު ޔަގީންކަމާ އެކީގައި ދަންނަވަން،" މިނިސްޓަރު ޝައުނާ ވިދާޅުވި އެވެ.

ތިލަމާލެ ބްރިޖުގެ މަސައްކަތް ކުރާ އިންޑިއާގެ އެފްކޮންސް ކުންފުނީގެ ސާވޭ ޕްލެޓްފޯމެއް، ވިލިމާލޭ ފަރަށް އަރައި ލިބުނު ގެއްލުމުގެ ސަބަބުން އެ ކުންފުނި 69 މިލިއަން ރުފިޔާއިން ޖޫރިމަނާކޮށް އެ ފައިސާ ދައްކަން އެއް މަސްދުވަހުގެ މުހުލަތެއް ދިނީ މިދިޔަ ނޮވެމްބަރު މަހު އެވެ. ނަމަވެސް އެ ފައިސާ ދައްކަން ދެކޮޅު ހަދައި، އެފްކޮންސް އިން މައްސަލަ އިސްތިއުނާފުކުރި އެވެ.

ޝައުނާ މިއަދު ވިދާޅުވީ، އެފްކޮންސް އިން މައްސަލަ އިސްތިއުނާފު ކުރުމުން އޭގެ ލީގަލް ރިވިއުއެއް ހެދި ކަމަށެވެ. އެ ލީގަލް ރިވިއުއިން ލަފާ ދިނީ އިންޑިޕެންޑެންޓް ޓެކްނިކަލް ރިވިއުއެއް ހެދުމަށް ކަމަށާއި، މިހާރު އޮތީ އެ މަރުހަލާގައި ކަމަށް ވިދާޅުވި އެވެ.

"މި ޖޫރިމަނާ މާފުކުރުމުގެ އެއްވެސް ވިސްނުމެއް، އަޅުގަނޑު ވެސް ސަރުކާރުގެ ވެސް ނެތް،" އެފްކޮންސް އިން މައްސަލަ އިސްތިއުނާފުކުރި ނަމަވެސް ޖޫރިމަނާ މާފު ނުކުރާނެކަން ފާހަގަކުރައްވައި ޝައުނާ ވިދާޅުވި އެވެ.

މާލެ-ވިލިމާލޭ ބްރިޖުގެ ސާވޭއަށް ބޭނުންކުރި ޕްލެޓްފޯމެއް ބިޔަ ރާޅުތަކާއެކު ވިލިމާލޭ ފަރަށް އެރީ މިދިޔަ އޮގަސްޓު މަހުގެ 16 ވަނަ ދުވަހު އެވެ. ބްރިޖުގެ މަސައްކަތް ކުރާ އިންޑިއާގެ އެފްކޮންސް ކުންފުނިން ޕްލެޓްފޯމު ފަރުމަތިން ފުންކުރީ 12 ދުވަސް ފަހުން އެކަމާ އެތައް ބަޔަކު ކަންބޮޑުވުން ފާޅު ކުރުމުންނެވެ.

އޭގެ ސަބަބުން ފަރުގެ 2755 އަކަމީޓަރުގެ ސަރަޙައްދަކަށް ގެއްލުންވެ، ފަރުގެ ހަތަރު ތަނަކަށް ޕްލެޓްފޯމުގެ ފައިތައް ވަދެ، އިސްކޮޅަށްވުރެ ފުން ވަޅުގަނޑު ހުރީ ހެދިފަ އެވެ.