ތާޒާ މޭވާއާއި ތަރުކާރި ފަސޭހައިން ގަނެލެވޭގޮތަށް އުރީދޫއިން "މޫލީ މާކެޓް" ތައާރަފްކޮށްފި

އުރީދޫގެ މޫލީ ޕުލެޓްފޯމްއާއި މާލެ ސިޓީ ކައުންސިލާއި ގުޅިގެން، ފަސޭހައިން ތާޒާ މޭވާއާއި ތަރުކާއި ގަނެވޭނެ އައު ހިދުމަތެއް، "މޫލީ މާކެޓް"ގެ ނަމުގައި ތައާރަފްކޮށްފިއެވެ.

އުރީދޫގެ އީ ކޮމާސް ޕުލެޓްފޯމް މޫލީގެ މި އައު ކެޓަގަރީ މެދުވެރިކޮށް، ލޯކަލް މާރުކޭޓުގައި ހުންނަ ބައެއް ފިހާރަތަކުން ވިއްކާ ތާޒާ މޭވާއާއި ތަރުކާރި ކޮންމެ ތަނެއްގައި ހުރެގެންވެސް، ފަސޭހައިން ގަނެލެވޭނެއެވެ. ހަމައެއާއިއެކު އެ ތަކެތި ގެއަށް ޑެލިވަރީކޮށްދިނުމުގެ ހިދުމަތްވެސް ފޯރުކޮށްދެއެވެ.

ހެބިޓަސް ފުރެޝް އަދި އެގްރިޒާ މޯލްޑިވްސް ފަދަ ލޯކަލް މާރުކޭޓުގައި ވިޔަފާރިކުރާ ވިޔަފާރިތަކުން ފޯރުކޮށްދޭ މޭވާއާއި ތަރުކާރީގެ ތެރެއިން މޫލީ މާރުކޭޓުން ލިބެން ހުންނަ ބައެއް ބާވްތަކަކީ، ފިޔާ، ލުނބޯ، ހިކަނދިފަތް، ކެބެޖު، އަލަނާސި، ބަރަބޯ، އިނގުރު، އަދި ފެހި މިރުހެވެ.

އުރީދޫ ފިޔަވާ އެހެނިހެން ނެޓްވޯކުތައް ބޭނުންކުރައްވާ ބޭފުޅުންނަށްވެސް މި ހިދުމަތުގެ ބޭނުން ހިފޭއިރު، މާރުކޭޓުން ގަންނަ ތަކެތި މާލެއަށާއި، ވިލިމާލެއަށާއި އަދި ހުޅުމާލެއަށްވެސް ޑެލިވާކޮށްދެއެވެ.

މޫލީ މާކެޓު ތައާރަފްކުރެވުމާއި އެކީގައި ލޯކަލް މާރުކޭޓުގައި މީހުން ތޮށްޖެހުން މަދުވުމާއި، ދިގު ކިއުތައް ހެދުން މަދުވުމާއި، އަދި ތާޒާ މޭވާއާއި ތަރުކާރި ފަސޭހަކަމާއިއެކު ގެއަށް ޑެލިވާ ކުރެވޭނެ އިންތިޒާމް ހަމަޖެހިއްޖެކަމަށް، އުރީދޫގެ މެނޭޖިންގް ޑިރެކްޓާ އަަދި ސީއީއޯ ހަމީދު އަލް ހަމާދީ ވިދާޅުވިއެވެ.

މީގެ އިތުރުން، މިހާރު މޫލީ މާކެޓުގައި ގަންނަން ހުރި ބާވަތްތަށް ފޯރުކޮށްދޭ ވިޔަފާރިތަކުގެ އިތުރުން، އެހެން ލޯކަލް މަރުކޭޓުގެ ވިޔަފާރިތަކުގެ މުދާވެސް މޫލީ މާކެޓުގައި ހިމެނުމުގެ ފުރުސަތު އުރީދޫއިން ދެއެވެ.