ބްރޯޑްކޮމްގެ ހުސްވެފައިވާ މަޤާމަށް އައްޔަންކުރަން ތިން ނަމެއް ކޮމިޓީން ތަޅުމަށް ފޮނުވައިފި

ބްރޯޑްކާސްޓިން ކޮމިޝަނުގެ ނައިބުރައީސް އިސްތިއުފާދެއްވުމާ ގުޅިގެން ހުސްވި މަޤާމަށް ކުރިމަތިލެއްވި ބޭފުޅުންގެ ތެރެއިން ތިން ބޭފުޅެއްގެ ނަންފުޅު މިނިވަން މުއައްސަސާތަކާ ބެހޭ ކޮމިޓީން ތަޅުމަށް ފޮނުވުމަށް ނިންމައިފިއެވެ.

ބްރޯޑްކޮމްގެ ނައިބުރައީސްގެ މަޤާމުގައި ހުންނެވި އަޙްމަދު ޤައިސްވަނީ ފާއިތުވި ޑިސެންބަރު މަހުގައި އިސްތިއުފާދެއްވައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ކެމްޕެއިނުގެ މަސައްކަތަށް ހުސްވެވަޑައިގެންފައެވެ.

ޤައިސް އިސްތިއުފާދެއްވުމުން ބްރޯޑްކޮމްއިން މެންބަރެއްގެ މަޤާމު ހުސްވުމާ ގުޅިގެން ރައީސް އޮފީހުން އެ މަޤާމަށް ކުރިމަތިލާން އިއުލާނުކުރިއެވެ. އެ މަޤާމަށް ކުރިމަތިލެއްވި ބޭފުޅުންގެ ތެރެއިން ރައީސް އިބްރާހީމުވަނީ އެމަނިކުފާނު އިސްކަންދެއްވާ ތަރުތީބުން ލިސްޓެއް ފޮނުއްވާފައެވެ.

މި ބޭފުޅުންގެ ތެރެއިން މިނިވަން މުއައްސަސާތަކާ ބެހޭ ކޮމިޓީން ތަޅުމަށް ފޮނުއްވީ ނުޒުހާއާއި އަމްރުއާއި ނަރީމާންގެ ނަންފުޅެވެ. ރައީސްގެ ލިސްޓުގައި ތިންވަނައަށް އޮތް ޝާންގެ ނަންފުޅު ކޮމިޓީން މަޖިލީހުގެ ތަޅުމަށް ނުފޮނުވައެވެ.

ބްރޯޑްކޮމްގެ މެންބަރު އަމްޖަދު ވަހީދުގެ ދައުރު ހަމަވުމާ ގުޅިގެން އެ މަޤާމަށް ކުރިމަތިލެއްވި ބޭފުޅުންގެ ތެރެއިން ހަތަރު ބޭފުޅެއްގެ ނަންފުޅު ރައީސް އިބްރާހީމްވަނީ މަޖިލީހަށް ފޮނުއްވާފައެވެ. އެ ނަންތައް ދިރާސާކުރުމުގެ މަސައްކަތް މިނިވަން މުއައްސަސާތަކާ ބެހޭ ކޮމިޓީންދަނީ ކުރަމުންނެވެ.