ލ. އިސްދޫ ކަލައިދޫ ސްކޫލުގެ ދަރިވަރުންތަކެއް ސްކޫލު ވަގުތުގައި ސްކޫލު ހޯލުން ބޭރަށް ދިއުމުން އެކުދިންނަށް ދިން އަދަބާމެދު ބައެއް ބެލެނިވެރިން ކަންބޮޑުވުން ފާޅުކޮށްފި އެވެ.
ބެލެނިވެރިއަކު "ދިޔަރެސް" އަށް ބުނި ގޮތުގައި, އަދަބެއްގެ ގޮތުން "ދެން ސްކޫލު ގަޑީގައި ބޭރަށް ނުދާނެ" ކަމަށް ގަނޑެއްގައި ލިޔުއްވުމަށްފަހު، އެ ގަނޑު ހިފަހައްޓައިގެން ސްކޫލް ހުރިހާ ކުދިންނަށް ފެންނަ ގޮތަަށް، އެސްމްބްލީ ސްޓޭޖް މަތީ ގާތްގަނޑަކަށް ދެ ގަޑިއިރު އެކުދިން ކޮޅަށް ބޭތިއްބި އެވެ.
އިސްދޫކަލައިދޫ ސްކޫލު ހިންގެވުމާ ހަވާލުވެ ހުރި ފަރާތަށް "ދިޔަރެސް" އިން ގުޅައި، އެކުދިންނަށް ދިން އަދަބާ ގުޅޭގޮތުން ސުވާލު ކުރުމުން ވަނީ ޖަވާބު ނުދީ ފޯނު ކަނޑާލާފަ އެވެ. އެހެންވެ މި މައްސަލައިގައި ސްކޫލުގެ ބަހެއް ވަނީ ލިބޭގޮތް ނުވެފަ އެވެ.