ތ.ބުރުނީގައި ރުކެއް ވެއްޓި އެކަކު ނިޔާވެއްޖެ

ތ.ބުރުނީގައި ރުކެއް ވައްޓާލައި އެ ރުއް ފުރޮޅަން އުޅުމުގެ ތެރޭގައި 4 މީހަކަށް އަނިޔާވެ އޭގެ ތެރެއިން އެކަކު ނިޔާވެއްޖެއެވެ.

ފުލުހުން ބުނެފައިވާ ގޮތުގައި މިކަމުގެ މައުލޫމާތު ފުލުހުންނަށް ލިބުނީ މިއަދު ހަވީރު 16:44 އެހާކަށް ހާއިރެވެ. އަނިޔާވި މީހުންނަށް ބުރުނީގެ ސިއްހީ މަރުކަޒުން ފަރުވާ ދިނުމަށްފަހު ދ.ކުޑަހުވަދޫ ގައި ހުންނަ ދ.އަތޮޅު ހޮސްޕިޓަލުން ދަނީ އިތުރު ފަރުވާ ދެމުންނެވެ.

މިހާދިސާގައި އެކަކު ނިޔާވެފައިވާއިރު އަނިޔާވެ އަނެއް 3 މީހުންތެރެއިން ދެމީހެއްގެ ހާލު ސީރިއަސްކަމަށް ފުލުހުން ބުނެފައިވެއެވެ. އަދި ނިޔާވި މީހާގެ ހަށިގަނޑާއި އަނިޔާވި 3 މީހުންވެސް މިހާރު މާލެ ގެނައުމުގެ މަސައްކަތް ކުރަމުންދާކަމަށް ފުލުހުން މައުލޫމާތު ދެއެވެ.

ފުލުހުން ދަނީ މި ހާދިސާއާއި ގުޅިގެން ބަލަންޖެހޭ ކަންކަން އިތުރަށް ބަލަމުންނެވެ.