ޑިންގީއަކުން ޖެހި ތުލުސްދޫ ކައިރިން މަރުވި ފަތުރުވެރިޔާ އެ ރަށު ސިއްހީ މަރުކަޒާ ހަމައަށް ގެންދިޔައީ ލޮރީއެއްގައެވެ.
އެ ހިސާބުގެ ފަޅަށް އެރި އުޅެނިކޮށް މަރުވި ފަތުރުވެރިޔާވަނީ، ކޯމަސް ބަލާލުމުގެ ބޭނުމުގައި ސްނޯކަލް ކުރުމަށް ކަނޑައެޅިފައިވާ ހިސާބުން ތަންކޮޅެއް ބޭރަށް ކަނޑަށް ނިކުމެފައެވެ. ފަޅުން ބޭރަށް ކަނޑަށް ނިކުމެގެން އުޅުނު ވަގުތުގައި އެ ހިސާބުން ހުރަސްކޮށްފައިވާ ދިޔަ ލޯންޗެއްގެ ދަށުވެ، އުޅަނދުގެ ބުރަފަތީގައި ޖެހި ގިނަ އަނިޔާތަކެއް ލިބުނެވެ. އަދި، މާގިނަ އިރުތަކެއް ނުވަނީސް މޫދުގަ އޮއްވާ އޭނާވަނީ މަރުވެފައެވެ.
މަރުވި ފަތުރުވެރިޔާ ލޮރީއެއްގައި ސިއްހީ މަރުކަޒަށް ގެންދަންޖެހުނު ސަބަބެއްކަމަށް އެ ރަށު ސިއްހީ މަރުކަޒުގެ އިންޗާޖް އަޙްމަދު ރަޝީދު ވިދާޅުވީ އެ ރަށުގައި އޮތް އެމްބިއުލަންސް ހަލާކުވެފައި އޮތުމެވެ. އޭނާ ވިދާޅުވި ގޮތުގައި އެމްބިއުލާންސް ހަލާކުވެފައި އޮންނަތާ މަހަކަށްވުރެ ގިނަ ދުވަސްވެއްޖެއެވެ.
އަދި އެމްބިއުލާންސްގައި ޖެހުނު މައްސަލަ ހައްލުކުރުމަށް ކޯޓޭޝަނެއް ހޯދުމަށް ހެލްތު މިނިސްޓްރީން އެދުމުން އެ ކޯޓޭޝަން ހޯދައި މިނިސްޓްރީއަށް ފޮނުވާފައިވާކަމަށާއި، އެންމެ ފަހުން މިނިސްޓްރީން ބުނި ގޮތުގައި އެ ކޯޓޭޝަން ފިނޭންސް މިނިސްޓްރީއަށް ފޮނުވައިގެން ކޯޓޭޝަނަށް ބޭނުންވާ ފައިސާ ހަމަޖެއްސުމުގެ މަސައްކަތް ކުރަމުންދާކަމަށްވެސް އޭނާ ވިދާޅުވިއެވެ.
މި މައްސަލައާ ގުޅިގެން އެ ޑިންގީ ދުއްވި އުމުރުން 45 އަހަރުގެ ދިވެއްސެއް ފުލުހުންވަނީ ހައްޔަރުކޮށްފައެވެ. އަދި އޭނާގެ ބަންދާމެދު ގޮތެއް ނިންމުމަށް ތުލުސްދޫ މެޖިސްޓްރޭޓު ކޯޓަށް އިއްޔެ އޭނާ ހާޒިރުކުރުމުން ބަންދަށް 10 ދުވަހުގެ މުއްދަތެއް ކޯޓުން ޖަހާފައިވާކަމަށް ފުލުހުން މައުލޫމާތު ދީފައިވެއެވެ.