މާޗުމަހުން ފެށިގެން ހަނިމާދޫ އެއާޕޯޓުގެ ރޭގަނޑުގެ ދަތުރުތައް މެދުކަނޑައިލަނީ

އަންނަ މާޗު މަހުގެ ފުރަތަމަ ދުވަހުން ފެށިގެން ހަނިމާދޫ އިންޓަނޭޝަނަލް އެއާޕޯޓަށް މޯލްޑިއަންގެ ރޭގަނޑުގެ ދަތުރުތައް މެދުކަނޑައިލާނެކަމަށް އެ ކުންފުނިން ހާމަކޮށްފިއެވެ.

މޯލްޑިވިއަނުން ބުނީ ހަނިމާދޫ އިންޓަނޭޝަނަލް އެއާޕޯޓް ތަރައްގީ ކުރުމުގެ މަޝްރޫއުގެ ދަށުން އަންނަ މާޗުގެ ފުރަތަމަ ދުވަހުން ފެށިގެން މޯލްޑިވިއަނުން ހަނިމާދޫ އެއާޕޯޓުގެ ރޭގަނޑުގެ ހުރިހާ ދަތުރުތަކެއް ވަގުތީގޮތުން މެނދުކަނޑާލާފައިވާކަމަށެވެ.

އަދި މީގެސަބަބުން ހަނިމާދޫ އަދި ޓްރިވެންޑުރަމާއި ދެމެދުގެ ދަތުރުތައްވެސް ވަގުތީ ގޮތުން މެނދުކަނޑާލާފައިވާކަން އެ ކުންފުނިން ހާމަކޮށްފައިވެއެވެ.

މޯލްޑިވިއަނުން ބުނީ 1 މާޗުގެ ފަހަށް ޓިކެޓް ނަގާފައިވާ މީހުން މޯލްޑިވިއަންގެ ކޯލްސެންޓަރު މެދުވެރިކޮށް ދަތުރުގެ ކަންތައްތައް ހަމަޖައްސައި ދެވޭނެކަމަށާއި އޭގެސަބަބުން ދިމާވެދާނެ ދަތިތަކަށް އެ ކުންފުނިން މާފަށް އެދޭކަމަށެވެ.

މޯލްޑިވިއަނުން ހަނިމާދޫ އެއާޕޯޓަށް ރޭގނަދޫ ކުރާ ދަތުރުތައް ވަގުތީ ގޮތުން މެދުކަނޑައިލާފައިވާއިރު އެ ދަތުރުތައް އަލުން ފަށާނެ ދުވަހެއް އަދި ހާމަކޮށްފައެއް ނުވެއެވެ.