ރައީސް އިބްރާހީމް މުހައްމަދު ސޯލިހު އެންމެ ބޮޑަށް ކޯފާވެވަޑައިގަންނަވަނީ އެމަނިކުފާނާ ދިމާލަށް "ޗޯރު އިބޫ" އޭ ގޮވުމުން ކަމަށް މައުލޫމާތު ލިބިއްޖެއެވެ.
ފަހަކަށް އައިސް އިދިކޮޅު މުޒާހަރާތަކުގައި ރައީސް އިބްރާހީމަށް ނިސްބަތްކޮށް "ޗޯރު އިބޫ"، "އިބޫ ޗޯރު"، "ޗޯރު އިބްރާހީމް" ފަދަ ނަންތައް ގޮވައެވެ. އަދި އެމަނިކުފާނު ކެމްޕެއިނަށް ރަށްރަށަށް ވަޑައިގަންނަވާއިރު ރަށްތަކުން އެއްވާ މީހުންވެސް ހަމަ އެގޮތަށް ގޮވައެވެ.
ރައީސް އިބްރާހީމް އއ. މަތިވެރިއަށް ކުރެއްވި ކެމްޕެއިން ދަތުރުފުޅުގައިވެސް އިދިކޮޅު ފަރާތްތަކުން ވަނީ އެއްވެ "ޗޯރު އިބޫ" އޭ ގޮވާފަައެވެ. އެކަމާ ގުޅިގެން އެމަނިކުފާނު ވަރަށް ކޯފާވެވަޑައިގަތްކަމަށް މައުލޫމާތު ލިބެއެވެ. މިގޮތުން އެރަށުގައި ވާހަކަ ދައްކަވަމުން ރައީސް އިބްރާހީމް ވަނީ އިދިކޮޅު މުޒާހަރާތައް ހުއްޓުވާލާނެ ކަމުގެ އިންޒާރުވެސް ދެއްވާފައެވެ.
ރައީސް އިބްރާހީމް މާލެ ސިޓީ އެމްޑީޕީގެ މައި ހަރުގޭގައި ބޭއްވި ޖަލްސާގައި ވާހަކަ ދައްކަން ފެއްޓެވުމާއި އެކު އެރޭ އެ ސަރަހައްދަށް އެއްވެ ތިބި އިދިކޮޅު ފަރާތްތަކުން ވަނީ އެއް އަޑަކުން "ޗޯރު އިބޫ" އޭ ގޮވާފައެވެ. އެރޭވެސް އެމަނިކުފާނު ހުންނެވީ ވަަރަށް ބޮޑަށް ކޯފާވެފައެވެ.
ޕީޕީއެމް ސަޕޯޓަރުންގެ އިތުރުން، ރައީސް ނަޝީދަށް ތާއީދު ކުރައްވާ ފަރާތްތަކުންވެސް މިހާރު ދަނީ ސޯޝަލް މީޑިއާގައިވެސް ރައީސް އިބްރާހީމަށް ނިސްބަތްކޮށް "ޗޯރު އިބޫ" ފަދަ ނަންތައް ބޭނުން ކުރަމުންނެވެ.