ޔޫކުރެއިނު ހަނގުރާމައިގައި މަރުވި ރަޝިޔާ ސިފައިންގެ އާއިލާތަކަށް ފައިސާ ދިނުމަށް ޕުޓިން ނިންމަވައިފި

ފާއިތުވި އަހަރުގެ ފެބްރުއަރީ މަހުގައި ރަޝިޔާއިން ޔޫކުރެއިނަށް އަރައި ފެށި ހަނގުރާމައިގައި މަރުވި އެ ޤައުމުގެ ސިފައިންގެ އާއިލާތަކަށް ފައިސާގެ ބަދަލު ދިނުމުގެ ޤަރާރެއްގައި ރަޝިޔާގެ ރައީސް ވަލްޑަމިއަރް ޕުޓިން ސޮއިކުރައްވައިފިއެވެ.

އަންގާރަދުވަހު ޕުޓިން ސޮއިކުރެއްވި ޤަރާރުގައި ބުނެފައިވަނީ ޔޫކުރެއިނުގައި ހިނގަމުންދާ ހަނގުރާމައިގެ ތެރޭގައި މަރުވެފައިވާ ރަޝިޔާ ސިފައިންގެ އާއިލާތަކަށް ފައިސާގެ އެހީތެރިކަމެެއްގެ ގޮތުގައި ކޮންމެ އާއިލާއަކަށް 5 މިލިއަން ރޫބްލް ނުވަތަ 68،800 އެމެރިކާ ޑޮލަރު ދޭނެކަމަށެވެ.

އަދި މި ޤަރާރުގައި ބަޔާންކޮށްފައިވަނީ ރަޝިޔާގެ ސިފައިންނާއި ސަލާމަތީ ބާރުތަކުގެ މުވައްޒަފުންނާއި އެމީހުންގެ އާއިލާތަކަށް އިތުރު އިޖުތިމާއީ ރައްކާތެރިކަމާއި ޔަގީންކަން ފޯރުކޮށްދޭނެ ކަމަށެވެ. މި ޤަރާރުވަނީ ރަޝިޔާގެ ޤާނޫނީ މައުލޫމާތާ ބެހޭ އިދާރާގެ ވެބްސައިޓުގައި ޝާއިއުކޮށްފައެވެ.

ހަނގުރާމައިގައި އަނިޔާވެ ނުވަތަ ބޮޑު ގެއްލުމެއް ލިބުނު ސިފައިންނަށް 3 މިލިއަން ރޫބްލް ނުވަތަ 41،300 އެމެރިކާ ޑޮލަރުގެ ފައިސާގެ އެހީއެއް ދިނުމަށްވެސް އެ ޤަރާރުގައި ހިމަނާފައިވެއެވެ.

ފެބްރުއަރީ 24 ގައި ރަޝިޔާއިން ޔޫކުރެއިނަށް އެރި ފަހުން ފާއިތުވި މުއްދަތުގައި މަރުވި ސިފައިންނާއި އަނިޔާވި ސިފައިންނަށް މި ޤަރާރުގެ ދަށުން އެހީތެރިކަން ފޯރުކޮށްދޭއިރު މި ޤަރާރުގައި ޕުޓިން ސޮއިކުރެއްވި ތާރީޚުން ފެށިގެން ޤަރާރަށް އަމަލުކުރަންވަނީ ފަށައިފައެވެ.