މަންޓާ އެއާއިން 12 ސީޕްލޭން ހޯދުމަށް އިއުލާނުކޮށްފި

މަންޓާ އެއާގެ ސީޕްލޭންގެ ހިދުމަތްތައް އިތުރަށް ފުޅާ ކުރުމަށް 12 ސީޕްލޭން ހޯދުމަށް އިއުލާނުކޮށްފި އެވެ.

މަންޓާ އެއާއިން ވަނީ އެއާލައިނަށް ޑީއެޗްސީ6 ޓްވިން އޮޓާ މަރުކާގެ 12 ސީޕްލޭން ވިއްކާނެ ނުވަތަ ކުއްޔަށް ދޭނެ ފަރާތެއް ހޯދުމަށް އިއުލާނު ކޮށްފަ އެވެ.

ޕްރޮޕޯސަލް ހުށަހެޅުމުގެ ފުރުސަތު އަންނަ މަހުގެ 15 ވަނަ ދުވަހުގެ މެންދުރު 12:00އާ ހަމައަށް ވަނީ ހުޅުވާލާފަ އެވެ.

މަންޓާ އެއާއިން ސީޕްލޭންގެ ޚިދުމަތުގެ އިތުރުން ރާއްޖޭގެ ތިން އެއާޕޯޓަކަށް ދަތުރު ވެސް ކުރަމުންނެވެ.

މަންޓާ އިން ސީޕްލޭން ދަތުރުތައް ފެށީ 2019 ވަނަ އަހަރު އެވެ. އެ އެއާލައިނުގެ ސީޕްލޭން ފްލީޓުގައި 16 ބޯޓު މިހާރު އޮންނައިރު، 30 ރިސޯޓަކަށް ފަތުރުވެރިން އުފުލަ އެވެ.