ހުއްދަ ނަގައިގެން ރާއްޖެއަށް ކުނި އެތެރެކުރެވޭ ގޮތަށް ހަދައި ކުނި މެނޭޖުކުރުމާ ބެހޭ ގާނޫނަށް ގެނައި އިސްލާހު ތަސްދީގު ނުކުރުމަށް ޖަމިއްޔާތަކުން ގޮވާލައިފި އެވެ.
ޒީރޯ ވޭސްޓް މޯލްޑިވްސް އާއި ސޭވްދަ ބީޗް އަދި ނޯ ޕްލާސްޓިކް މޯލްޑިވްސްގެ އިތުރުން ޓްރާންސްޕޭރެންސީ މޯލްޑިވްސް ހިމެނޭހެން 17 ޖަމިއްޔާއަކުން މިއަދު ނެރުނު ނޫސްބަޔާނުގައި ބުނީ، ކުނި މެނޭޖްކުރުމުގެ ބިލު ހަ މަސް ދުވަހު މަޖިލީހުގައި އޮތް އިރު އެފަދަ ބޮޑު މައްސަލައަކާ ގުޅިގެން އެއްވެސް ވަރަކަށް އާންމުންގެ ހިޔާލު ހޯދާފައި ނުވާ ކަމަށެވެ.
ޖަމިއްޔާތަކުން ފާހަގަކުރި ގޮތުގައި އެ ބިލު ތަސްދީގުކޮށްފި ނަމަ ދުނިޔޭގެ ތަރައްގީވެފައިވާ ގައުމުތަކުގެ "ކުނި ގޮނޑަކަށް" ރާއްޖެ ވެދާނެ އެވެ. ކުނި މެނޭޖްކުރުމަށް އެކަށީގެންވާ ސްޓްރެޓެޖީތަކާއި ވަސީލަތްތައް ނެތް ގައުމަކަށް ޕްލާސްޓިކް ކުނި އިމްޕޯޓް ކުރުމުގެ ސަބަބުން ކުނި މެނޭޖްކުރަން އިތުރަށް އުނދަގޫވެގެން ދާނެ ކަމަށް ވެސް އެ ޖަމިއްޔާތަކުން ބުންޏެވެ.
އެގޮތުން އޭޝިއާ، އެފްރިކާ އަދިއެމެރިކާއިން އެތެރެކުރާ ޕްލާސްޓިކް ކުނީގެ ނޭދެވޭ އަސަރުކޮށްފައިވާ ގައުމުތަކުން އެކަން ހުއްޓާލުމަށް މިހާރުވެސް ގޮވާލާފައިވާކަން ފާހަގަކުރި އެވެ.
އެހެންކަމުން ރާއްޖެއަށް ކުނި އެތެރެކުރެވޭ ގޮތަށް ބިލު ތަސްދީގުކޮށްފިނަމަ އެތައް މައްސަލަތަކެއް ކުރިމަތިވާނެކަން ފާހަގަކޮށް އެގޮތަށް ބިލު ތަސްދީގު ނުކުރުމަށް އެ ޖަމިއްޔާތަކުން ސަރުކާރަށް ގޮވައިލި އެވެ.