އިސްލާމް ދީނާ ޚިލާފުކަމެއް ރާއްޖޭގައި ހިންގުމުގެ ފުރުސަތު ސަރުކާރުން ނުދޭނެކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަށް ޖަވާބު ދެއްވަމުން މިއުވާން ވިދާޅުވީ ރާއްޖޭގައި ދީނާ ޚިލާފު ކަމެއް ހިނގާކަމަށް ވާނަމަ ސަރުކާރުން އެކަމުގައި އަޅަން ޖެހޭ ފިޔަވަޅެއް އަޅާނެ ކަމަށާއި އެކަހަލަ ކަމެއް ހިނގާތޯ ސަރުކާރުން ބަލަންވެސް ބަލާނެކަމަށެވެ.
"އަޅުގަނޑުމެން އެއްގޮތަކަށްވެސް ދޫކޮށެއް ނުލާނެ. ދިވެހިރާއްޖެއަކީ ސައްތައިން ސައްތަ އިސްލާމީ ގައުމެއް. އިސްލާމް ދީނާ ޚިލާފު އަމަލުތަކެއް ރާއްޖޭގައި ކުރުމުގެ ހިންގުމުގެ ފުރުސަތެއް ސަރުކާރަކުން ނުދޭނެ" މިއުވާން ވިދާޅުވެފައިވެއެވެ.
މިއުވާން މިފަދައިން ވިދާޅުވެފައިވާއިރު އިސްލާމް ދީނާ ޚިލާފު އެތަކެއް ކަމެއް މިދިޔަ 48 ގަޑިއިރުގެ ތެރޭގައިވެސް ހިނޣާފައިވާއިރު އެއިން އެއްވެސް ކަމަކަށް ސަރުކާރުން އެއްވެސް އެޗެއް ބުނެފައެއް ނުވެއެވެ.
އެގޮތުން ރާއްޖޭގެ ސަރުކާރުގެ އެއްބާރުލުމާއެކު އަވަށްޓެރި އިންޑިއާއަށް ނިސްބަތްވާ ހަތަރު މީހަކާއި ލަންކާއަށް ނިސްބަތްވާ ދެމީހަކު ރާއްޖެއައިސް ނަސާރާދީނުގެ ފޮތްތަކެއް ބަހަން ފަށައިފައިވާ ކަމުގެ މައުލޫމާތު "ދިޔަރެސް"އަށް ވަނީ ލިބިފައެވެ.
މީގެއިތުރުން އައްޑޫ ސިޓީގެ މަގުތަކުގައި ތާރު އަޅައިގެން ރަނގަޅު ފެންވަރަކަށް ހެދުމުގެ މަސައްކަތް، ހިންދޫ ދީނުގެ އަޅުކަމަކުން އިންޑިއާގެ ކުންފުނިން ރަސްމީކޮށް ފެށި މައްސަލައެއްވެސް ވަނީ ފެންމަތިވެފައެވެ.
އެގޮތުން އާއްމުވެފައިވާ އެ ވީޑިއޯއިން ހިންދޫ ދީނުގެ މީހުން ހަފްލާތައް ފަށާއިރު ކުރާ އަޅުކަމެއް ފެނިގެންދެއެވެ. އެގޮތުން މަގުގައި ތާރު އަޅާ މެޝިން ބާއްވާފައި އޮންނައިރު، އޭގައި ކާއްޓަކުން ޖަހާ މަންޒަރު ވީޑިއޯއިން ފެނިގެން ދެއެވެ. އަދި އަދި ކާށިފެޅުމުގެ ކުރިން ކާށީ ދެއަތް ތެރެއަށްލާ، މޫނުގަޔާ މޭގައި ޖައްސާ އެއްޗެއް ކިޔަވާ، މިފަދަ ހަރަކާތް ވެސް ކޮށްފައި ވެއެވެ. އެއަށްފަހު ކާށީގައި ހުރި ފެން އެމެޝިން މައްޗަށް އޮއްސާ މިކަހަލަ ހަރަކާތްތަކެއް ވީޑިއޯއިން ފެނިގެން ދެއެވެ.
މިކަމާ ގުޅިގެން ސަރުކާރަށް ފާދުކިޔުން އަމާޒުވެފައިވާއިރު ސަރުކާރުން އެއްވެސް އެއްޗެއް ބުނެފައެއް ނުވެއެވެ.