ޤައުމީ ސަލާމަތަށްޓަކައި ހާމަނުކުރެވޭ އެއްބަސްވުންތަކަކީ މިނިވަންކަމަށް ނުރައްކާތެރި އެއްބަސްވުންތަކެއް: ޓޮމް

ޤައުމީ ސަލާމަތަށްޓަކައި ހާމަނުކޮށް ސިއްރުކުރާ އެއްބަސްވުންތަކަކީ އޭގެ ޒާތުގައި ރާއްްޖޭގެ މިނިވަންކަމަށް ނުރައްކާތެރި އެއްބަސްވުންތަކެއް ކަމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު އަޙްމަދު ޠާރިޤު (ޓޮމް) ވިދާޅުވެއްޖެއެވެ.

ޓޮމް މިފަދައިން ވިދާޅުވީ މިނިވަންދުވަހުގެ ތަހުނިޔާ އަރިސްކުރައްވައި ފޭސްބުކްގައި މިއަދު ޝާއިއުކުރެއްވި ލިޔުއްވުމެއްގައެވެ. ޓޮމް މިފަދައިން ވިދާޅުވެފައިވަނީ ދިވެހި ސަރުކާރާއި އިންޑިއާއާ ދެމެދުގައި ހަދާފައިވާ އެއްބަސްވުންތަކަށް އިޝާރާތްކުރައްވައެވެ.

އޭނާގެ ލިޔުއްވުމުގައިވަނީ ސަރުކާރުން ހާމަކުރަން ދެކޮޅު ހަދާފައިވާ އެއްބަސްވުންތަކުގެ ލިސްޓެއް ހިމަނުއްވާފައެވެ. ސަރުކާރުން އިންޑިޔާއާއެކު ހަދަމުން އަންނަ އެއްބަސްވުންތަކުގެ ތެރެއިން އެއްވެސް އެއްބަސްވުމެއް ހާމަކުރަން ސަރުކާރުން މިހާތަނަށް އެއްބަސްވެފައިނުވެއެވެ.

މި އެއްބަސްވުންތަކުގެ ތެރެއިން ވަރަށް ގިނަ އެއްބަސްވުންތައް ހޯދުމަށް، މައުލޫމާތު ހޯދައި ލިބިގަތުމުގެ ހައްގުގެ ދަށުން "ދިޔަރެސް"އިން އެދިފައިވާނެއެވެ. ނަމަވެސް ސަރުކާރުގެ ހުރިހާ ވުޒާރާއަކުންވެސް އެކި ބަހަނާތައް ދައްކައި އެ މައުލޫމާތުތައް ހާމަކުރަންވަނީ ދެކޮޅުހަދާފައެވެ.

ރާއްޖެއާއި އިންޑިއާ ދެމެދުގައި ހަދާފައިވާ އަސްކަރީ އެއްބަސްވުންތައް ރައްޔިތުންގެ މަޖިލީހަށް ގެނެސް ދިރާސާކުރުމަށް އިދިކޮޅުން ހުށަހެޅުމުން، މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީގެ ބައްދަލުވުމެއްގައި އެ އެއްބަސްވުންތައް ޕްރެޒެންޓޭޝަނެއްގެ ގޮތުގައި ދައްކާފައިވީ ނަމަވެސް އެއްބަސްވުންތައް ދިރާސާކުރުމުގެ ފުރުސަތު މެންބަރުންނަށް ދީފައިނުވެއެވެ.

މި އެއްބަސްވުންތައް ސިއްރުކުރާ ސަބަބެއްގެ ގޮތުގައި ސަރުކާރުން މައިގަނޑު ގޮތެއްގައި ފާހަގަކުރަނީ އެއްބަސްވުންތައް ހާމަކޮށްފިނަމަ ޤައުމީ ސަލާމަތަށް ނުރައްކާވުމުގެ އިހުތިމާލު އޮތުމެވެ.

އެކަމަށް އިޝާރާތްކުރައްވައި ޓޮމް ވިދާޅުވީ މި އެއްބަސްވުން ތަކަކީ ޤައުމީ ސަލާމަތައްޓަކައި ރައްޔިތުންނަށް ހާމަ ކުރުން މަނާ އެއްބަސްވުން ތަކަކަށް ވާނަމަ އޭގެ ޒާތުން މި އެއްބަސްވުން ތަކަކީ ޤައުމީ ސަލާމަތަށް، ދިވެހިރާއްޖޭގެ ސިޔާދަތައް، މިނިވަންކަމަށް ނުރައްކާތެރި އެއްބަސްވުން ތަކެއްކަން ޔަޤީން ކަމަށެވެ.