އިންޑިއާގައި ވެރިކަންކުރާ ޕާޓީ ބީޖޭޕީގެ ތަރުޖަމާން ކީރިތި ރަސޫލާ ﷺއަށް ފުރައްސާރަކުރި މައްސަލައާ ގުޅިގެން އެ ނަބިއްޔާ ﷺ ދިފާޢުގައި ޒުވާނުން ހިޔާލު ފާޅުކުރަން "މަގޭ ނަބިއްޔާ ﷺ" ގެ ނަމުގައި ސައިކަލު ބުރެއް ބާއްވަން ނިންމައިފިއެވެ.
ކީރިތި ރަސޫލާ ﷺއަށް ފުރައްސާރަކުރުމާއި ދެކޮޅަށް ޒުވާނުން ހިޔާލުފާޅުކޮށް ބާއްވާ މި ސައިކަލު ބުރު ފަށާނީ ހޮނޮހިރު ދުވަހުގެ ހަވީރު 4:00 ޖަހާއިރު ރަސްފަންނު ސަރަހައްދުންނެވެ.
ބީޖޭޕީގެ އިސް ދެމަސްއޫލުވެރިޔަކު ރަސޫލާއަށް ފުރައްސާރަ ކޮށްފައި ވަނީ މިދިޔަ މަހުގެ 28 ވަނަ ދުވަހުއެވެ. އިންޑިއާގެ ޓީވީ ޗެނަލުން ދެއްކި ބަހުސްގައި ނުޕުރް ޝަރުމާވަނީ ނަބިއްޔާ ޞައްލަﷲ ޢަލައިހި ވަސައްލަމައަށް ނިސްބަތްކޮށް ހުތުރު ބަސްތައް ބޭނުންކޮށް، އެކަލޭގެފާނުގެ ޝަޚުޞިއްޔަތަށް ތައުހީނުކޮށްފައެވެ. އަދި އޭގެ އިތުރަށް ކީރިތި ޤުރުއާނަށްވެސް ފުރައްސާރަކޮށް، އެ ފޮތާމެދު ނަފުރަތާއި ރުޅިވެރިކަން އުފައްދަން މަސައްކަތްކޮށްފައެވެ.
އެކަމާއި ގުޅިގެން އިންޑިއާ އާއި ދުނިޔޭގެ އެކި ކަންކޮޅުތަކުގައި އުޅޭ މުސްލިމުން ދަނީ ކަންބޮޑުވުން ފާޅުކުރަމުންނެވެ. ނަމަވެސް ދިވެހި ރާއްޖެއިން މިކަމާއި ގުޅިގެން ފިނި ބަޔާނެއް ނެރިފައިވަނީ އެކަން ހިނގިތާ ދިނަ ދުވަސް ފަހުންނެވެ. މިކަމާއި ގުޅިގެން ގިނަ ބަޔަކު އަންނަނީ ދިވެހި ސަރުކާރަށް ފާޑު ކިޔަމުންނެވެ.