27 ވިލޭރޭ ދެ ހަރަމްފުޅުގައި އަޅުކަމުގައި މިލިއަނުން މީހުން!

މަސްޖިދުލް ހަރަމް އަދި މަސްޖިދުއް ނަބަވީގައި ރޭ ކުރި ތަރާވީސް އަދި ދަމު ނަމާދުގައި އެތައް ގިނަ ބަޔަކު ބައިވެރިވެ، ދެ ހަރަމްފުޅު ފުރާލައިފި އެވެ.

ސައުދީ އަރަބިއްޔާގެ ބައެއް ނޫސްތަކުން ބުނާ ގޮތުގައި، މި ރަމަޟާން މަހުގެ 27 ވިލޭރޭއާ ދިމާކޮށް ރޭ ދެ މަސްޖިދުލް ހަރާމްގައި ކުރި ތަރާވީހް ނަމާދުގައި ދެ މިލިއަނަށް ވުރެ ގިނަ މީހުން ބައިވެރިވި އެވެ.

ރަމަޟާން މަހުގެ ފަހު ދިހައިގެ އޮނަހިރި ރޭތަކުގެ ތެރެއިން ވެސް، 27 ވިލޭރެއަކީ ލައިލަތުލް ގަދްރި ކަމަށް ގިނަ އިލްމުވެރިން ބުރަވެވަޑައިގަންނަވަ އެވެ. އެހެންކަމުން ކޮންމެ އަހަރަކުވެސް ރަމަޟާން މަހުގެ 27 ވިލޭރޭގެ އަޅުކަމުގައި ގިނަ އަދަދެއްގެ މީހުން ބައިވެރިވެ އެވެ.

ރޭ ދެ ހަރަމްފުޅުގައި ކުރި ތަރާވީސް ނަމާދާއި ދަމު ނަމާދުގައި ގިނަ އަދަދަކަށް މީހުން ބައިވެރިވެފައިވާ އިރު، މިއީ ކޮވިޑް-19 އާ ގުޅިގެން އެޅި ފިޔަވަޅުތަކާއެކު ހަރަމްފުޅުތައް ބަންދުކުރި ފަހުން އެންމެ ގިނަ އަދަދަކަށް މީހުން ޖަމާއަތުގައި ބައިވެރިވީ ފުރަތަމަ ފަހަރެވެ.

އިއްޔެގެ އިރު އޮއްސުމާއެކު ގިނަ އަދަދެއްގެ ބަޔަކު މައްކާ އާއި މަދީނާގެ ހަރަމްފުޅަށް ގޮސް އަޅުކަން ކުރުމުގައި މަސްއޫލުވެ އުޅުނެވެ. އެހެންވެ އެ ސަރަހައްދުގައި މީހުން ގިނަވުމުގެ ސަބަބުން ދިމާވެދާނެ ސިއްހީ ނުރައްކަލަކަށްޓަކައި އެމްބިއުލަންސްތައް ތައްޔާރީ ހާލަތަށް ގެނައުމާއެކު ހަރަމްފުޅުތަކާއި ކައިރީގައި ހުންނަ ސިއްހީ ހިދުމަތްދޭ ތަންތަންވެސް އޮތީ ތައްޔާރީ ހާލަތައް ގެނެސްފަ އެވެ.