ނަޝީދުގެ އޮފީހުން ފައިސާ ހަރަދު ކުރި ގޮތް ހާމަކުރަން ހަތް ދުވަސް ދީފި

ކުރީގެ ރައީސް އަދި ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދުގެ އޮފީހުން ފައިސާ ހަރަދު ކުރި ގޮތް ހާމަކުރަން ހަތް ދުވަހުގެ މުއްދަތެއް ދީފިއެވެ.

ކުރީގެ ރައީސް މުހައްމަދު ނަޝީދުގެ އޮފީހުން މައުލޫމާތަކަށް އެދި ހުށަހެޅިފަހުން 21 ދުވަސް ވީ ފަހުންވެސް އެއްވެސް ޖަވާބެއް ދީފައި ނުވާތީ އެ ޝަކުވާ އިންފޮމޭޝަން ކޮމިޝަނަރ އޮފީހަށް ހުށަހަޅާފައިވާތީ އެ ޝަކުވާ ބެލުމަށް މިއަދުބޭއްވި ބައްދަލުވުމުގައި އެ އޮފީހުގެ ފަރާތުން ވަނީ ނަޝީދުގެ އޮފީހަށް ޖަވާބު ދާރީވުމަށް ފުރުސަތު ދީފައެވެ.

އިންފޮމޭޝަން ކޮމިޝަނަރ އޮފީހުން ބުނީ އަމިއްލަ ފަރާތަކުން 12 ޑިސެމްބަރު 2021 ގައި ނަޝީދުގެ އޮފީހުން މައުލޫމާތުތަކެއް ހޯދުމަށް އެދިފައިވާކަމަށާއި ނަމަވެސް 4 ޖެނުއަރީ 2022 އަށް 21 ދުވަސް ހަމަވީއިރު އެއްވެސް ޖަވާބެއް ނަޝީދުގެ އޮފީހުން ދީފައި ނުވާކަމަށެވެ.

އިންފޮމޭޝަން ކޮމިޝަނަރ އޮފީހުން ބުނިގޮތުގައި ރައީސް ނަޝީދުގެ އޮފީހުން މައުލޫމާތު ހޯދުމަށް ހުށަހަޅާފައިވާ ފަރާތް އައިމަން ލަތީފް އެ އޮފީހުން ދެ މައުލޫމާތަކަށް އެދިފައި ވެއެވެ. އެއީ 2020 ވަނަ އަހަރުގެ އޮފީސް ހިންގުމަށް ލިބުނު ޖުމުލަ ބަޖެޓު ބަޖެޓަށް ފައިސާ ލިބުނު ގޮތުގެ ތަފްސީލާއި 2020 ވަނަ އަހަރު އެ އޮފީސް ބަޖެޓުން ކޮންމެ މަހެއް ވަކިން ފައިސާ ހަރަދު ކުރެވުނު ގޮތުގެ ތަފްސީލާއި ކޮންމެ މަހެއްގެ ފައިސާ ހަރަދު ކުރެވުނު އެންމެހާ ހަރަކާތްތަކާއި ބޭނުންތަކުގެ ތަފްސީލް ނުވަތަ ކޮންމެ ހަރަކާތަކަށް ނުވަތަ ބޭނުމަކަށް ހޭދަ ކުރި ފައިސާ ގެ އަދަދު އިނގޭނެގޮތަކަށް މައުލޫމާތު ހޯދުމަށެވެ.

އެގޮތުން ރައީސް ނަޝީދުގެ އޮފީހުން 14 ފެބުރުއަރީގައި 2020 ވަނަ އަހަރުގެ އޮފީސް ހިންގުމަށް ލިބުނު ޖުމުލަ ބަޖެޓު ބަޖެޓަށް ފައިސާ ލިބުނު ގޮތުގެ ތަފްސީލު ހާމަކުރި ނަމަވެސް ދެވަނަ އަށް ފާހަގަކުރި ކަންކަމުގެ މައުލޫމާތު ދީފައި ނުވާކަމަށް އިންފޮމޭޝަން ކޮމިޝަނަރ އޮފީހުން ބުނެފައިވެއެވެ.

އެ ބައްދަލުވުމުގައި ރައީސް ނަޝީދުގެ އޮފީހުން ބައިވެރިވެވަޑައިގަތީ އެ އޮފީހުގެ ލީގަލް ބައިން ތޯހާ މުހައްމަދާއި އާދަމް ސައްތާރެވެ. އެ ބައްދަލުވުމުގައި ވާހަކަ ދައްކަވަމުން ތޯހާ ވިދާޅުވީ ރައީސް ނަޝީދުގެ އޮފީހަކަށް މައުލޫމާތަށް ހުށަހެޅި ފަރާތުން އެ މައުލޫމާތު ހުށަހެޅިކަމަށް ބުނި ނަމަވެސް އެ އޮފީހުގެ ސެކެޓްރޭޓުން ޗެކްކުރި އިރު އެ ފޯމު ލިބިފައި ނެތްކަމަށާއި އީމެއިލް ފޮނުވިކަމަށް ބުނެފައި ވީ ނަމަވެސް ސެކެޓްރޭޓުން ޗެކް ކުރި އިރު އީމެއިލް އެއްވެސް ފެންނަން ނެތްކަމަށެވެ. އޭނާ ވިދާޅުވީ ރައީސް ނަޝީދުގެ އޮފީހަކަށްއެ މައުލޫމާތަށް އެދި ފޯމް ހުށަހަޅާފައެއް ނެތްކަމަށެވެ.

މީގެއިތުރުން ތޯހާ ވިދާޅުވީ އިންފޮމެޝަން ކޮމިޝަން އޮފީހުން ފޮނުވި އީމެއިލްވެސް ލިބިފައި ނެތްކަމަށާއި ފަހުން އެ މައުލޫމާތު ލިބުމުން އެ މައުލޫމާތު ނުލިބި ވަނީ އެ ފޯމް ލިބިފައި ނުވާތީކަމަށް ބުނެ ސިޓީއަކުން ހުށަހަޅާފައިވާނެކަމަށެވެ. އަދި ފަހުން ދިން ފުރުސަތުގައި އެދިފައިވާގޮތަށް މި މަހުގެ 14 ވަނަ ދުވަހު މައުލޫމާތު ހިއްސާކޮށްފައި ވާނެކަމށާއި ނަމަވެސް މައުލޫމާތު ހޯދުމަށް ފާހަގަކޮށްފައިވާ ދެވަނަ ޕޮއިންޓުގެ މައުލޫމާތު ދިނުމަށް ވަގުތު ބޭނުންވާކަމަށް ތޯހާ ވިދާޅުވެފައިވެއެވެ.

މިކަމާއި ގުޅިގެން އިންފޮމޭޝަނަރ އޮފީހުން އެކަމަށް ބޭނުންވަނީ ކިތަށް ދުވަސްތޯ އަހާފައިވެއެވެ. ތޯހާ ވިދާޅުވީ ހަތް ދުވަހުގެ ތެރޭ އެ މައުލޫމާތު ހާމަކުރެވޭނެކަމަށެވެ. އެހެންކަމުން ކޮމިޝަނުން ވަނީ އެ މައުލޫމާތު ހާމަކުރުމަށް ރައީސް ނަޝީދުގެ އޮފީހަށް ހަތް ދުވަސް ދީފައެވެ.