މިދިޔަ އަހަރުގެ މެއި ހަވަނަ ދުވަހުގެ ރޭ ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލުމަށް ދިން ބޮމުގެ ހަމަލާގެ ޝަރީއަތް ލަސްވުމަކީ ކަންބޮޑުވާން ޖެހޭ ކަމެއް ކަމަށް ކުރީގެ އިސްލާމިކް މިނިސްޓަރު އަދި ދިވެހިރާއްޖޭގެ އިސްލާމީ ޔުނިވަސިޓިގެ ޗާންސެލާ ޑރ މުހައްމަދު ޝަހީމް ވިދާޅުވެއްޖެއެވެ.
ޝަހީމް ކުރެއްވި ޓްވީޓެއްގައި ވިދާޅުވީ، ރައީސް ނަޝީދު އަވަހާރަކޮށްލަން ދިން ހަމަލާއަކީ އިންސާނިއްޔަތާ ހިލާފު ބޮޑު ޖަރީމާއެއް ކަމަށާއި އެ ޖަރީމާގެ ޝަރީއަތް ލަސްވުމަކީ ވަރަށް ދެރަ ކަމެއް ކަމަށެވެ.
އިތުރަށް ޑރ.ޝަހީމު ވިދާޅުވީ އެމަނިކުފާނުގެ ހަށިކޮޅަށް އަމާޒުކޮށް ދިން ހަމަލާގެ ޝަރީއަތް އަވަަސް ކޮށް އެ އަނިޔާވެރި އަމަލު ހިންގި މީހުންނަށް ހައްގު އަދަދު ވީ އެންމެ އަވަހަކަށް ދޭން ޖެހޭ ކަމަށެވެ.
މެއި ހަވަނަ ދުވަހުގެ ރޭ ބޮން ގޮއްވާލި މައްސަލާގައި ދައުލަތުން ދައުވާ ކުރަނީ ހަތަރު މީހަކަށެވެ. އޭގެ ތެރޭގައި ހިމެނޭ އަދުހަމު އަހުމަދު ރަޝީދަށް ވަނީ މިދިޔަ ޑިސެމްބަރު މަހުގެ 14 ވަނަ ދުވަހު 23 އަހަރުގެ ޖަލު ހުކުމެއް އިއްވާފައެވެ.