ގޯލާނުގެ ބިންތަކުގައި އިސްރާއީލުގެ އާބާދުވުންތައް ދެގުނައަށް އިތުރުކުރާނެކަމަށް އެ ޤައުމުން ބުނެފި

އިސްރާއީލުން އިސްތިއުމާރުކޮށްފައިވާ ގޯލާންގެ ބިންތަކުގައި އެ ޤައުމުގެ އާބާދުވުންތައް ދެ ގުނައަށް އިތުރުކުރާނެ ކަމަށް އިސްރާއީލުގެ ބޮޑުވަޒީރު ނަފްތާލީ ބެނެޓް ބުނެފިއެވެ. އެ ބިމަކީ މީގެ 50 އަހަރު ކުރިން ސޫރިޔާގެ އަތުން އިސްރާއީލުން ފޭރިގަތް ބިމެކެވެ.

ބެނެޓް ބުނި ގޮތުގައި ގޯލާންގެ ބިންތަކުގައި އިސްރާއީލުގެ އާބާދުވުންތައް ޤާއިމުކުރުމަށް އެތައް މިލިއަން ޑޮލަރެއް ޚަރަދުކުރަން ނިންމީ، 2019 ވަނަ އަހަރު އެމެރިކާގެ ކުރީގެ ރައީސް ޑޮނާލްޑް ޓްރަމްޕުގެ ސަރުކާރުން އެ ސަރަހައްދުގެ މައްޗަށް އިސްރާއީލުގެ ސިޔާދަތީ ބާރު ހިނގާނެ ކަމަށް ކަނޑައެޅުމުން ކަމަށެވެ. އަދި އެ ނިންމުމަށް އެމެރިކާގެ މިހާރުގެ ސަރުކާރުން ބަދަލެއް ގެންނާނެ ކަމަށް ނުބެލެވޭތީއެވެ.

ގޯލާނުގައި ބޭއްވި ޚާއްޞަ ކެބިނެޓު ބައްދަލުވުމެއްގައި ބެނެޓް ބުނެފައިވަނީ މިއީ ގޯލާނުގެ ވަގުތު ކަމަށެވެ. އަދި މިއީ އިސްރާއީލަށް ތާރީޚީ ވަގުތުކޮޅެއް ކަމަށެވެެ. އާބާދުވުންތައް މަޑުޖެހުނު އަހަރަކަށްފަހު މިހާރު އިސްރާއީލް ސަރުކާރުގެ އަމާޒަކީ ގޯލާނުގައި ހުރި އިސްރާއީލުގެ އާބާދުވުންތައް ދެ ގުނައަށް އިތުރުކުރުން ކަމަށްވެސް އޭނާ ބުންޏެވެ.

ގޯލާނުގެ ބިންތައް އިސްރާއީލުން އެންމެ ފުރަތަމަ ޖަހައިގަތީ މެދުއިރުމަތީގެ ހަނގުރާމައިގެ ތެރެއިން 1967 ވަނަ އަހަރުއެވެ. އެ ބިންތަކަކީ އިސްރާއީލުގެ ބައެއްކަން އެ ޤައުމުން އިއުލާނުކުރީ 1981 ވަނަ އަހަރުގައެވެ. އެ ނިންމުމަކީ ބައިނަލްއަޤުވާމީ ޤާނޫނުތަކާ ޚިލާފު ނިންމުމެއްކަމަށް ބައިނަލްއަޤުވާމީ މުޖުތަމަޢުގެ ބޮޑު ބައަކުން ދެކެއެވެ.

ގޯލާނުގައި މިހާރު އިސްރާއީލުގެ އާބާދުވެރިންގެ 25،000 މީހުން ދިރިއުޅެއެވެ. އަދި އެ ސަރަހައްދުގައި ދުރޫޒުންގެ 23،000 މީހުން ދިރިއުޅެއެވެ. އެ ސަރަހައްދުގެ މައްޗަށް އިސްރާއީލުގެ ސިޔާދަތު ހިނގާނެކަން އެންމެ ފުރަތަމަ ބަލައިގަތް ޤައުމަކީ އެމެރިކާއެވެ.