ދެ އަހަރުގެ ތެރޭގައި ސައިބާ ސެކިއުރިޓީ ގާނޫނެއް އެކުލަވައިލަން މަސައްކަތްކުރަނީ

ކުރިއަށް އޮތް ދެ އަހަރުގެ ތެރޭގައި ސައިބާ ސެކިއުރިޓީ ގާނޫނެއް އެކުލަވާލައި، އަމަލުކުރަން ފެށުމުގެ މަސައްކަތް ކުރާކަމަށް އެންވަޔަރުމެންޓް އެންޑް ޓެކްނޮލޮޖީ މިނިސްޓަރު އައިމިނަތު ޝައުނާ ވިދާޅުވެއްޖެއެވެ.

ރާއްޖެ ޓީވީގެ ޕްރޮގްރާމެއްގައި ވާހަކަފުޅުދައްކަވަމުން މިނިސްޓަރު ވިދާޅުވީ، ސައިބާ ސެކިއުރިޓީއާ ގުޅޭ މައްސަލަތައް ކުރިމަތިވާކަމަށާއި އެފަދަ މައްސަލަތައް ހިނގާ ގޮތް ފާހަގަކުރެވިފައިވާކަމަށެވެ.

މިނިސްތަރު ވިދާޅުވީ ސައިބާ ސެކިއުރިޓީއާ ގުޅޭ މައްސަލަތައް ހައްލު ކުރުމަށް މަސައްކަތް ކުރާކަމަށެވެ. އެގޮތުން ސައިބާ ސެކިއުރިޓީއާ ގުޅޭ ކަންކަމަށް ހޭލުންތެރި ކުރުމަށް މުވައްޒަފުން ތަމްރީނު ކުރުމާއި ގަވާއިދުން ސިސްޓަމްތައް މޮނިޓާކުރުމުގެ މަސައްކަތް ކުރާނެކަމަށް މިނިސްޓަރު ވިދާޅުވެފައިވާއިރު ކުރިއަށް އޮތް ދެ އަހަރުގެ ތެރޭގައި އެފަދަ މައްސަލަތަކާ ގުޅޭ ގަވާއިދެއް އެކުލަވާލައި އަމަލުކުރަން ފެށުމަކީ ސަރުކާރުގެ އަމާޒެއްކަމަށްވެސް ވިދާޅުވެފައިވެއެވެ.

މި ސަރުކާރުން މަސައްކަތް ކުރަނީ ނެޝަނަލް އިންސްޓިޓިއުޝަން އޮފް ކޮމިއުނިކޭޝަން ޓެކްނޮލޮޖީ (އެންއައިސީޓީ) އަށް ވަރަށް ބޮޑު އަހަންމިއްޔަތު ކަމެއް ދީގެންކަމަށާއި އަދި ކުރިއަށް އޮތް އަހަރު ތަކުގެ ތެރޭގައި އޭގެ ނަތީޖާ ފެންނާނެކަމަށްވެސް މިނިސްޓަރު ވިދާޅުވެފައިވެއެވެ.