ސައިބާ ހަމަލާތައް ދޭނަމަ ޙަޤީޤީ ހަނގުރާމައެއް ފެށިދާނެ ކަމުގެ އިންޒާރު ބައިޑެން ދެއްވައިފި

ސައިބާ ހަމަލާތަކުގެ ސަބަބުން ޙަޤީޤީ ހަނގުރާމައެއް ފެށުމަކީ ވެދާނެ ކަމެއް ކަމުގެ އިންޒާރު އެމެރިކާގެ ރައީސް ޖޯ ބައިޑަން ދެއްވައިފިއެވެ. ބައިޑަން މިފަދަ އިންޒާރެއް ދެއްވާފައިވަނީ އެމެރިކާގެ ރަސްމީ ބައެއް އިދާރާތައް ޗައިނާއިންނާއި ރަޝިޔާއިން ހެކުކުރާ ކަމަށް ތުހުމަތުވެފައިވާ ދުވަސްވަރެއްގައެވެ.

އަންގާރަދުވަހު ދެއްކެވި ވާހަކަފުޅުގައި ބައިޑަން ވިދާޅުވީ ރޭންސަމްވެއާ ފަދަ ނުރައްކާތެރި ވައިރަސްތަކާއި ސޮފްޓުވެއާ ބޭނުންކޮށްގެން ދެމުންދާ ސައިބާ ހަމަލާތަކުގެ ސަބަބުން ނުކުންނަ ނޭދެވޭ ނަތީޖާތަކާއި ލިބޭ ގެއްލުންތައް އަމަލީ ގޮތުން ޙަޤީޤީ ދުނިޔެއަށް ފޯރަމުންދާ ކަމަށެވެ.

އަދި ޙަޤީޤީ ހަނގުރާމައެއް ދުނިޔޭގެ ބޮޑު ބާރަކާއެކު ފެށުމަށް މެދުވެރިވެއްޖެނަމަ، އެ ފަދަ ހާލަތެއް ވުޖޫދުވާނެ ސަބަބަކީ ސައިބާ ހަމާލަތައް ކަމަށްވެސް ބައިޑަން ވިދާޅުވިއެވެ. މިފަދައިން އޭނާ ވިދާޅުވީ އެމެރިކާގެ 18 ޖާސޫސީ އިދާރާއެއް ބަލަހައްޓައި ހިންގާ ޑިރެކްޓާ އޮފް ނޭޝަނަލް އިންޓެލިޖެންސްގެ އޮފީހުގައި ދެއްވި ތަޤުރީރެއްގައެވެ.

ފާއިތުވި ދުވަސްތަކުގައި އެމެރިކާއަށް އަމާޒުކޮށް ދިން ސައިބާ ހަމަލާތަކެއްގެ ސަބަބުން އެމެރިކާގެ ސައިބާ ސަލާމަތުގައި ހުރި ނާޒުކުކަން ވަނީ ހާމަވެފައެވެ. އެ ހަމަލާތަކުގެ ތެރެއިން އެމެރިކާގެ މުހިއްމު ތެޔޮ ޕައިޕްލައިނެއް ހުއްޓުމަކަށް ގެނެސްފައިވެއެވެ.

މި ހަމަލާތަކާ ގުޅިގެން ބައިޑެންގެ ސަރުކާރުންވަނީ ޗައިނާ އަދި ރަޝިޔާގެ ސަރުކާރުތަކަށް ތުހުމަތުގެ އިނގިލި ދިއްކޮށްފައެވެ. އަދި އެ ހަމަލާތަކާ ގުޅިގެން ފެންނަ އަދި ނުފެންނަ އާލާތްތައް ބޭނުންކޮށްގެން ރައްދު ހަމަލާ ދޭނެ ކަމަށް އެމެރިކާގެ އޮފިޝަލުން ވިދާޅުވެފައިވީ ނަމަވެސް އެމެރިކާއަށް ދޭ ސައިބާ ހަމަލާތައް އިތުރުވެފައިވެއެވެ.

ހަނގުރާމައެއް ކުރާނީ ކޮން ޤައުމަކާ ދެކޮޅަށްކަން ސާފުކޮށް ބަޔާންނުކުރެއްވި ނަމަވެސް 2022 ވަނަ އަހަރު އޮންނަ ދައުރުގެ މެދުތެރެއިން ބާއްވާ އާންމު އިންތިޚާބާ ދިމާކޮށް ރަޝިޔާއިން ދޮގު މައުލޫމާތު ފެތުރުމުގެ ބޮޑު އޮޕަރޭޝަނެއް ހިންގާކަމަށް ބައިޑަން ތުހުމަތުކުރެއްވިއެވެ.