އެއާ އިންޑިޔާގެ ފަސިންޖަރުން ތަކެއްގެ މައުލޫމާތު ލީކުވެއްޖެ

އެއާ އިންޑިއާގެ ޑޭޓާ އަށް ދިން ސައިބާ އެޓޭކާ ގުޅިގެން 4.5 މިލިއަން ފަސިންޖަރުންގެ ޒާތީ މައުލޫމާތު ލީކުވެއްޖެއެވެ.

ފަސިންޖަރުންގެ ނަމާއި ޕާސްޕޯޓާއި ޓިކެޓުގެ އިތުރުން ކްރެޑިޓް ކާޑުގެ މައުލޫމާތުތަކެއް ވެސް ލީކުވެފައިވެއެވެ. މީގެ ތެރޭގައި ހިމެނެނީ އޮގަސްޓް 2011 އިން މި އަހަރުގެ ފެބްރުއަރީއާ ހަމައަށް އެއާ އިންޑިއާ އިން ދަތުރުކުރި މީހުންގެ މައުލޫމާތު ކަމަށް ޚަބަރު ލިބެއެވެ.

އެއާ އިންޑިއާގެ ޑޭޓާތައް ލީކުވެފައިވާކަން މިދިޔަ ފެބްރުއަރީ މަހު އެނގުމާއިއެކު، އެ އެއާލައިނުން ވަނީ އެ މައްސަލަ ދިރާސާކުރަން ފަށާފައެވެ. ކަސްޓަމަރުންގެ މައުލޫމާތުގެ ރައްކާތެރިކަމަށް ވަރަށް ހާއްސަ އިސްކަމެއް ދޭކަމަށާއި އެހެންކަމުން ކަސްޓަމަރުންގެ އަމިއްލަ މުހިއްމު މައުލޫމާތުތަކެއް ލީކުވުމުން އެ ކުންފުނިން ވަރަށް ހިތާމަ ކުރާ ކަމަށްވެސް ބުންޏެވެ.

އެ އެއާލައިނުން ބުނީ މި މައުލޫމާތުތައް ލީކުވި ފަހުން އެ ކުންފުނީގެ ޑޭޓާތަކުގެ ސަލާމަތީ ކަންކަން އިތުރަށް ވަރުގަދަ ކޮށްފައިވާނެ ކަމުގައެވެ. މިދިޔަ އަހަރު އީޒީޖެޓް އެއާލައިނަށް ވެސް ސައިބާ އެޓޭކެއް ކުރިމަތިވިއެވެ.