އެޗްޕީއޭގެ ފޭސްބުކު ޕޭޖް ހެކުކޮށްފި

އެޗްޕީއޭގެ ފޭސްބުކު ޕޭޖް ހެކުކޮށްފައިވާ ކަމަށް އެ އިދާރާއިން ބުނެފިއެވެ.

އެޗްޕީއޭއިން ތަފާތު މައުލޫމާތުތައް ގެނެސްދިނުމަށް ބޭނުންކުރަމުންދާ މީސްމީޑިޔާގެ އެކި މަންސަތަކުގެ ތެރެއިން އެ އިދާރާގެ ފޭސްބުކް ޕޭޖު ހެކުކުރުމާއެކު މިހާރު އެ ޕޭޖު ފޭސްބުކުންވަނީ އުނިކޮށްފައެވެ. އެ ޕޭޖު މިހާރު ނުފެނެއެވެ.

އެޗްޕީއޭއިން ކުރި ޓުވީޓެއްގައި އެ އިދާރާއިން ބުނެފައިވަނީ އެ އިދާރާގެ އެކައުންޓަށް ނިޔަތް ނުބައި ބަޔަކު ދިން ހަމަލާތަކެއްގެ ސަބަބުން އެ އެކައުންޓުވަނީ "ކޮމްޕްރޮމައިސް"ވެފައި ކަމަށެވެ. ބެލެވޭ ގޮތުގައި އެ އިދާރާގެ ޕޭޖު މިހާރުވަނީ އެ އިދާރާއަށް ގެއްލިފައެވެ.

އަދި އެޗްޕީއޭއިން ބުނެފައިވަނީ އެ އެކައުންޓު އަނބުރާ ހޯދުމަށް އެ އިދާރާއިން މިހާރު މަސައްކަތްކުރަމުން އަންނަ ކަމަށެވެ. އަދި އެ މަސައްކަތްކުރާ ވަގުތުތަކުގައި އެޗެޕީއޭއިން ދޭ މައުލޫމާތުތަކާއި ކޮވިޑް-19އާއި ވެކްސިން ދިނުމުގެ ޕްރޮގުރާމާ ގުޅޭ އެންމެ ފަހުގެ މައުލޫމާތު ހޯދުމަށް އެ އިދާރާގެ ޓުވިޓާ އެކައުންޓާއި، ޓެލެގުރާމު އަދި ވައިބާ ޗެނަލްތައް ބޭނުންކުރުމަށް އެ އިދާރާއިން އެދިފައިވެއެވެ.